चिनियाँ राष्ट्रपति सी जिनपिङ २५ गते नेपाल आउने

काठमाण्डौ, २२ असोज । चिनियाँ राष्ट्रपति सी जिनपिङ यही असोज २५ गते नेपाल आउनुहुने भएको छ । परराष्ट्र मन्त्रालयले बुधबार वक्तव्य जारी गरेर सीको नेपाल भ्रमण बारेमा औपचारिक जानकारी गराउदै भ्रमणको तालिका समेत सार्वजनिक गरेको छ ।
मन्त्रालयले सार्वजनिक गरेको भ्रमण तालिकाअनुसार राष्ट्रपति सी अक्टोबर १२ (असोज २५) गते काठमाडौं आउने कार्यक्रम छ । सी को भ्रमण दुई दिनको रहने मन्त्रालयले जनाएको छ ।
परराष्ट्र मन्त्रालयको भ्रमण तालिका अनुसार चिनियाँ राष्ट्रपति अक्टोबर ११ मा भारतको चेन्नई पुग्ने र १२ तारेखमा काठमाडौं आइपुग्ने कार्यक्रम छ । २५ गते नेपाल आउने र २६ गते उहां बेइजिङ फर्किनुहुने छ ।
सी राष्ट्रपति विद्यादेवी भण्डारीको निमन्त्रणामा नेपाल आउन लाग्नुभएको हो । सीको नेपाल भ्रमणको बेला नेपाल र चीनबीच केही परियोजनामा सम्झौता गर्ने कार्यक्रम छ । सीको सम्मान मा राष्ट्रपति विद्यादेवी भण्डारीले रात्रिभोज दिने कार्यक्रम रहेको छ ।
भ्रमणका क्रममा चीनका राष्ट्रपति सीले नेपाली समकक्षी भण्डारीसँग औपचारिक भेटघाट गर्नुहुनेछ । राष्ट्रपति सीले प्रतिनिधिमण्डलस्तरको दुई पक्षीय वार्ता भने नेपालका प्रधानमन्त्री केपी शर्मा ओलीसँग गर्ने परराष्ट्र मन्त्रालयले जनाएको छ । नेपाल भ्रमणको क्रममा चिनियाँ राष्ट्रपति सीले नेकपाका अध्यक्ष पुष्पकमल दाहाल र प्रमुख प्रतिपक्षी दलका नेता शेरबहादुर देउवालगायतसँग पनि भेटवार्ता गर्ने कार्यक्रम तय भएको छ ।
चनिया राष्ट्रपति सि नेपाल भ्रमणमा आउने तयारी भएसंगै अन्तर्राष्ट्रिय समुदायले पनि उहांको भ्रमणलाई चासोका साथ हेरेको छ । चिनियाँ राष्ट्रपतिको नेपाल भ्रमणको मिति टुंगो लागेसंगै नेपाल सरकारले तयारी तीब्र बनाउदै नीतिगत तयारी देखि सडक सिंगार्ने काममा विशेष ध्यान दिएको छ ।