श्रोत नखुलेको ४० लाख बढि नगद सहित दुई भारतीय नागरिक पक्राउ

भैरहवा, २६ भदौ । जिल्ला प्रहरी कार्यालय रुपन्देहीले स्रोत नखुलेको नेपाली तथा भारतीय रुपैयाँ, केही थान रकम उल्लेख भएका चेक, बिभिन्न बैंकका चेक र केही एटिएम कार्ड सहित दुई जना भारतीय नागरिकलाई पक्राउ गरेको छ ।
जिल्ला प्रहरी कार्यालयबाट खटिई गएको प्रहरी टोलीले सिद्धार्थनगरपालिका वार्ड नम्बर १ बाईपास स्थित सडकमा चेकजाँच गर्ने क्रममा भारत थाना नौतनवा, ग्राम लौटन बर्ष २४ को रितेशकुमार मधेसिया र सोही ठाउं बस्ने बर्ष २४ को निरजकुमार अग्रहरीलाई स्रोत नखुलेको ४० लाख बढि नगद सहित बिहीबार अपरान्ह ४ बजे पक्राउ गरेको हो ।
प्रहरीका अनुसार भारतवाट शंकाष्पद रुपमा आईरहेको भारतीय यु पी ५६ वाई ७० ४९ नम्वरको मोटरसाईकललाई रोकी मोटरसाइकल चालकले पछाडी बोकेको झोला खान तलासी गर्दा श्रोत नखुलेको अबैध रकम (हुण्डी) सहित उनीहरुलाई पक्राउ गरिएको हो ।
जिल्ला प्रहरी कार्यालयका प्रहरी प्रवक्ता तथा सूचना अधिकारी प्रहरी नायव उपरिक्षक बीरेन्द्रबहादुर शाहीका अनुसार उनीहरुको साथबाट विभिन्न दरका नेपाली नोटहरु रु ३८ लाख ९३ हजार १००, विभिन्न दरका भारतीय नोट रु १ लाख ६४ हजार सहित जम्मा रु ४० लाख ५७ हजार १०० नगद बरामद भएको छ ।
यस्तै भारतीय यु पी ५६ वाई ७०४९ नम्वरको मोटरसाईकल थान १, बिभिन्न बैंकका बिभिन्न ब्यक्तिको नाममा बिभिन्न मितिमा काटिएका रु २७ लाख ४८ हजार ७०० बराबरको चेक थान १० र बिभिन्न बंैकका चेक बुक थान ५ तथा भारतीय र नेपाली बैंकका एटिएम कार्ड थान ७ समेत उनीहरुबाट बरामद भएको प्रहरीले जनाएको छ ।