बुटवल, ६ भदौ । इन्टलेक्च्युअल एकेडेमी बुटवल ११ का विद्यार्थीको सक्रियतामा संकलित रकम बिरामीका अभिभावकलाई हस्तान्तरण गरिएको छ ।
बुटवल २ फुलवारी बस्ने शिवलाल गौतम र शोभा गौतमकी १६ वर्षिय छोरी ज्ञानधरा गौतमको उपचारका लागि सो रकम प्रदान गरिएको हो । लामो समयदेखि जन्डिस रोगबाट पीडित ज्ञानधराको कलेजो नै फेर्नुपर्ने अवस्था छ ।
उपचारका लागि १५ लाख रुपैयाँ भन्दा बढी खर्च लाग्ने तर घरको आर्थिक अवस्था कमजोर भएकाले सहयोग स्वरुप इन्टलेक्च्युअल एकेडेमीका विद्यार्थीहरुले एक कार्यक्रम बिच बिस हजार एक सय बिस रुपैयाँ ज्ञानधराकी आमा शोभालाई प्रदान गरेका हुन् ।
विद्यालयमा क्रियाशिल जुनियर रेडक्रस सर्कल र बाल क्लबको सक्रियतामा विद्यार्थी, शिक्षक, कर्मचारी र विद्यालय प्रशासनबाट सो रकम संकलन भएको हो । सो रकम रेडक्रसकी अध्यक्ष एन्जिला पोख्रेल र वाल क्लवकी अध्यक्ष बबि गुरुङ्गले आमा शोभालाई शुक्रवार प्रदान गर्नुभएको हो ।
