भारतको गोण्डाबाट ईन्धन आयात गरिने

कपिलवस्तु, ५ भदौ । नेपाल आयल निगमले भारतको गोण्डा डिपोबाट पेट्रोलियम पदार्थ आयात गर्ने भएको छ ।
यस अघि भारतकै बेतालपुर र मुगलसराय डिपो बाट पेट्रोलियम पदार्थ आयात गर्दै आएको निगमले नयाँ डिपो गोण्डाबाट समेत छिटै पेट्रोलियम पदार्थ आयात गर्ने भएको हो ।
नेपाल आयल निगम, पश्चिमाञ्चल पेट्रोलियम डिलर्स एशोसिएसन र कपिलवस्तु जिल्लाका पेट्रोलियम ब्यवसायी बिच बुधबार कपिलवस्तुमा आयोजित छलफल तथा अन्तरक्रिया कार्यक्रममा निगमका ५ नम्बर प्रदेश प्रादेशिक कार्यालय भलवारीका प्रमुख ईन्जिनियर सूरज शाहले ब्यवसायीहरुको माग अनुसार वितरण प्रणालीलाई थप ब्यवस्थित गर्न गोण्डा डिपोबाट समेत पेट्रोलियम पदार्थको आयात गर्ने ब्यवस्था मिलाउन लागिएको जानकारी गराउनु भयो ।
कार्यालय प्रमुख शाहले गोण्डा डिपोबाट आयात गरिने पेट्रोलियम पदार्थ कृष्णनगर नाका हुदै नेपाल भित्रिने जानकारी गराउनु भयो । भलवारीको भण्डारण क्षमता कम रहेको र प्रत्येक बर्ष १२ प्रतिसतका दरले पेट्रोलियम पदार्थको माग बढ्दै गएकाले थप नपुग डिजल र पेट्रोल गोण्डा डिपोबाट आयात गर्न लागिएको हो कार्यालय प्रमुख शाहले भन्नुभयो ।
भलवारी डिपोबाट रुपन्देही, नवलपरासी, कपिलवस्तु, पाल्पा, स्याङ्गजा, गुल्मी, अर्घाखाँची र बागलुङ्ग समेत गरी ८ जिल्लामा पेट्रोलियम पदार्थ बितरण हुंदै आएको छ । यी जिल्लामा दैनिक पेट्रोल २५० किलो लिटर, डिजल ११०० किलो लिटर र मट्टितेल १० किलो लिटर खपत हुने गरेको छ । तर भलवारीको भण्डारण क्षमता अनुसार पेट्रोल १ दिन भन्दा कम, डिजल ३ दिन र मट्टितेल ६० दिनलाई पुग्ने छ ।
यहि अवस्थालाई मध्येनजर गरेर नपुग डिजल र पेट्रोल गोण्डा डिपोबाट आयात गरी ब्यवसायीको माग अनुसार वितरणको ब्यवस्था मिलाउन लागिएको कार्यालय प्रमुख शाहले जानकारी गराउनु भयो ।