सैनामैनामा शिक्षकहरुलाई प्रविधिमा सक्षम बनाउन एक महिने तालिम

बुटवल, १ भदौ । रुपन्देहीको सैनामैना नगरपालिकाले नगरका सामुदायिक विद्यालयहरुको शिक्षामा सुधार ल्याउन शिक्षकहरुलाई सूचना प्रविधिमा जोड्ने प्रकृया अघि बढाएको छ । सैनामैनामा रहेका सामुदायिक विद्यालयका करिब दुईसय शिक्षकहरुलाई प्रविधिमा सक्षम बनाउन आईतवारदेखि एक महिने सूचना प्रबिधि तालिम सुरु गरेको छ । तालिम सैनामैनाका बिभिन्न चार स्थानमा एकैसाथ संचालन गरिएको नगरपालिकाले जनाएको छ ।
सैनामैनाका नगर प्रमुख चित्रबहादुर कार्कीले तालिमबाट अवको दुई महिनामा सैनामैनाका ७० प्रतिशत शिक्षक शिक्षिका सूचना प्रविधिमा दक्ष हुने बिश्वास ब्यक्र गर्नुभयो । उहाँले सवै सामुदायिक बिद्यालयमा ल्यापटप प्रोजेक्टर बितरण गरिसकेको र अब यसको प्रयोग कसरी गर्ने भन्ने बिषयमा दक्ष जनशक्तिमार्फत तालिम दिलाउन लागेको बताउनु भयो ।
सैनामैनाका प्रमुख प्रशासकीय अधिकृत कृष्णप्रसाद भण्डारीले शिक्षामा बिशेष सुधारका लागि यो तालिम संचालन गरिएको बताउनु भयो । गत साल पनि यस प्रकारको तालिम संचालन गरेको तर छोटो समयको तालिम भएकोले यस बर्ष लामो समयको तालिम संचालन गरिएको बताउँदै उहाँले तालिमले शिक्षक वर्गमा क्षमताको विकास हुने बताउनु भयो ।
सैनामैनाका शिक्षकहरुको मागलाई मध्यनजर गरेर तालिम संचालन गरिएको सैनामैनाका शिक्षा प्रमुख हेमराज अर्यालले बताउनु भयो । शिक्षकहरुलाई दक्ष बनाएर कक्षा कोठामा सूचना प्रविधिको प्रयोग गर्न यो तालिम उपयुक्त हुने सैनामैनाका प्रबक्ता रत्नबहादुर पौडेलले बताउनु भयो । पर्रोहा मा.वि. का प्रधानाध्यापक बलबहादुर के.सीले यस प्रकारको तालिमले शिक्षकहरुमा अध्यापन गराउने क्षमताको बिकास हुने बताउनु भयो ।