रामकुमार श्रेष्ठ
नवलपरासी, १ भदौ । पूर्वी नवलपरासीको अरुणखोलामा आएको बाढीले डाइभर्सन बगाए पछि सडक पुन अवरुद्ध भएको छ ।
आइतबार साँझ पहाड तिर परेको पानीले खोलामा पानीको सतह बढेपछि डाइभर्सन समेत नाघ्ने गरी बाढी आएर डाइभर्सन बगाएको हो ।
महेन्द्रराजमार्गको अरुणखोला पुल भाँचिएका कारण बनाइएको डाइभर्सन सडक भन्दा माथिवाट खोलाको बाढी बग्न थाले पछि यातायात ठप्प भएको छ ।
आइतवार सांझ ५ बजेपछि लगातारको वर्षाका कारण अरुणखोलामा पानीको सतह बढेपछि गाडी बगाउने जोखिम हुन नदिन स्थानीय प्रशासनले डाइभर्सनमा गाडी गुडाउन रोक लगाएको हो ।
जिल्ला ट्राफिक प्रहरी कार्यालयबाट अरुणखोलामा खटिएका सई राजेन्द्र कुमार कार्कीले दिएको जानकारी अनुसार सांझ साढे ५ बजे पछि यातायात रोकिदा महेन्द्र राजमार्ग हुदै पुर्वपश्चिम हिडेका सयौं सवारी साधन अरुणखोलामा अलपत्र परेका छन् ।
पानीको सतह पुरै नघटेसम्म बाढीले गाडी बगाउने जोखिमहुने त्रासले यातायात संचालनमा रोक लगाईएको सई कार्कीले जानकारी दिनुभयो । पानीको सतह पुरै घटेपछि अवस्था हेरेर यातायात खुलाइने छ ।
५ दिन अघि अरुणखोला पुलमा गाडी ठोक्किएका कारण पुल भाँचिए पछि ३ दिन लगाएर बैपल्पिक सडक बनाएर आवागमन सुचारु गरिएको थियो । अरुण खोलामा ह्युम पाइप राखेर बनाएको कच्चि डाइभर्सन सडक भन्दा माथिवाट डाईभर्सन पुरिने गरी बाढि आए पछि पूर्व पश्चिम राजमार्ग अवरुद्ध भएको हो ।
