रोटरी पुरस्कारको लागि प्रस्ताव आह्वान
बुटवल, ३० साउन । रोटरी क्लब अफ बुटवलले वितरण गर्ने रोटरी सेवा पदकको विधा छनोट गरिएको छ ।
पदक तथा पुरस्कार छनोट उप समितिको बिहिवार बसेको वैठकले उक्त विधामा पुरस्कार प्रदान गर्ने निर्णय सहित पुरस्कारको लागि प्रस्ताव आह्वान समेत गरेको छ । रोटरी वर्ष २०१९÷२०२०को लागि नारी उत्थान र लैगिक समानता क्षेत्रमा समाजमा प्रेरणादायी कार्य गरेको व्यक्ति वा संस्थालाई पदक प्रदान गर्ने निर्णय भएको हो ।
रोटरी सेवा पदक व्यवस्थापन समितिको अध्यक्ष डा नारायण प्रसाद पन्थको अध्यक्षतामा बसेको बैठकले अक्टोवर १० तारिक भित्र पदकको लागि मनोनयन पेश गर्न समय तोकेको हो । नेपालका सबै रोटरी क्लब तथा जिल्ला प्रशासन कार्यालय मार्फत पदकको लागि मनोनयन गर्न सकिने छ ।
पुरस्कार, पदक छनोट उपसमिति संयोजकमा निवर्तमान अध्यक्ष डा नारायण प्रसाद पन्थ, निर्वाचित अध्यक्ष सुनिल श्रेष्ठ सह संयोजक, पुर्व अध्यक्षको तर्फबाट अजयमान श्रेष्ठ सदस्य, गैर रोटरियन वरिष्ट पत्रकार वालकृष्ण चापागाई सदस्य, क्लवका सचिव रोमनाथ शर्मा सदस्य सचिव रहेका छन । पुरस्कारको राशि २ लाख रुपैयाँ रहेको छ ।
अघिल्लो वर्ष वायरलेस प्रविधिद्वारा देशको ग्रामीण क्षेत्रमा सूचना प्रबाह गर्ने लक्ष्य बोकेर नेपाल वायरलेस सञ्जाल परियोजनामार्फत इन्टरनेट संजाल विस्तार गर्न सफल व्यक्तित्व महाविर पुनलाई पदक प्रदान गरिएको थियो ।
आर्थिक, सामाजिक र सामुदायिक क्षेत्रमा योगदान पुराएको कुनैपनि व्यक्ति वा संस्थाले पुरस्कारको लागि मनोनयन गर्न सक्ने व्यवस्था भएको पुर्व अध्यक्ष अजयमान श्रेष्ठले जानकारी दिनुभयो । शिक्षा, स्वास्थ्य सरसफाई र सामुदायिक कार्यहरु, सिप श्रृजना र विकास, गरिवी निवारण, जनोपयोगि खोज, नारी उत्थान र लैगिक समानता विषयमा रहेर क्लबले पुरस्कार प्रदान गर्दे आएको छ । पदक डिसेम्वर १ तारिखमा एक कार्यक्रम विच प्रदान गरिने रोटरी क्लब अफ बुटवलले जनाएको छ ।
