बुटवल । यही जेठ २२ देखि २६ गतेसम्म राजधानी काठमाण्डौमा सञ्चालन हुने चौध वर्ष मुनिको (यु–१४) विद्यालय स्तरीय राष्ट्रिय खेलकुद प्रतियोगितामा सहभागी हुन लुम्बिनी प्रदेशबाट ७८ खेलाडी छनोट भएका छन् ।
दुईदिनसम्म बुटवलमा भएको छनोट प्रतियोगिताबाट ब्याटमिन्टन, टेबलटेनिस, बास्केटबल, एथलेटिक्स, रग्बी र क्रिकेटसहित विभिन्न खेल विधाबाट ७८ खेलाडीहरु छानिएका हुन् । लुम्बिनी प्रदेशभरिका ४५० विद्यार्थी सहभागी छनोट प्रक्रियाबाट उत्कृष्ट प्रदर्शन गर्ने खेलाडीहरु अन्तिम टोलीमा अटाएका हुन् ।
नेपाल विद्यालय खेलकुद महासंघ लुम्बिनी प्रदेश अध्यक्ष लेखनाथ पौडेलका अनुसार यु–१४ उमेर समूह अन्तर्गतका खेलकुदका लागि ७८ खेलाडी छनोट भएका छन् भने क्रिकेटमा यु–१६ उमेर समूहका खेलाडीहरु प्रतिस्पर्धा गर्ने छन् ।
उपाध्यक्ष हेम थापाका अनुसार एथलेटिक्सतर्फ छात्र रिले र लङजम्पबाट ११ खेलाडी, टेबलटेनिसतर्फ छात्र डबल र छात्रा सिंगलबाट ७, बास्केटबलतर्फ छात्र र छात्रा दुबै समूहबाट ९, रग्बीतर्फ २६, ब्याटमिन्टनतर्फ छात्र र छात्रा सिंगल र डबल गरेर ७ र क्रिकेटतर्फ १६ जना छात्र छनोट भएका छन् । यस्तै, टोलीनेता र उपनेता एक–एक जना गरी कुल ७८ जनाको टोली तयार भएको हो ।
नेपाल विद्यालय खेलकुद महासंघ लुम्बिनीको संयोजनमा सम्पन्न उक्त छनोट प्रतियोगितामा प्याब्सन नेपाल, एन प्याब्सन र नेपाल शिक्षक महासंघको सहकार्य रहेको कोषाध्यक्ष हेमा बेल्बासेले जानकारी दिनुभयो ।
छनोटमा परेका खेलाडीहरुले अब राष्ट्रिय खेलकुद परिषद् (राखेप) को आयोजनामा राजधानीमा हुने यु–१४ प्रतियोगितामा लुम्बिनी प्रदेशको तर्फबाट प्रतिनिधित्व गर्दै प्रतिस्पर्धा गर्नेछन् ।
