काठमाडौं । जिल्ला प्रशासन कार्यालय सुनसरीले धरानमा जातीय र धार्मिक तनाव बढिरहेका बेला सम्भावित हिंसा रोक्न २४ घण्टे निषेधाज्ञा जारी गरेको छ । केही दिन अघि धरानमा गोरु काटेर मासु खाएको विषयलाई लिएर हिन्दु र गैरहिन्दु समुदायबीच द्वन्द्व हुनसक्ने भन्दै जिल्ला प्रशासन कार्यालयले निषेधाज्ञा जारी गरेको हो ।
जिल्ला प्रशासन कार्यलयल सुनसरीले एक सूचना प्रकाशित गरी धरान उपमाहनगरपालिका क्षेत्रमा धार्मिक, साम्प्रदायिक साथै जनस्वास्थ्य संकट तथा शान्ति सुरक्षाको संवेदनशिलतालाई समेत ध्यानमा राखी निषेधाज्ञा जारी गरिएको जनाएको छ । सुनसरीका प्रमुख जिल्ला अधिकारी हुमकला पाण्डेका अनुसार गएराति १२ बजेदेखि आजराति १२ बजेसम्म लागु हुने गरी निषेधाज्ञा जारी गरिएको छ ।
हिन्दु र गैरहिन्दु दुवै पक्षले आज विरोधका कार्यक्रम आयोजना गरेपछि थप द्वन्द्व सिर्जना नहोस् भन्नका लागि निषेधाज्ञा जारी गरिएको प्रमुख जिल्ला अधिकारी पाण्डेले जानकारी गराउनु भयो । निषेधाज्ञामा अत्यावश्यक बाहेक कुनै पनि धार्मिक, सामाजिक, राजनैतिक सभा तथा ¥याली गर्न नपाइने भनिएको छ । अहिलेसम्म निषेधाज्ञा पूर्णरूपमा पालना भएको र सुरक्षा व्यवस्था कडा पारिएको जिल्ला प्रहरी कार्यालय सुनसरीका प्रहरी नायव उपरीक्षक (डीएसपी) तथा प्रवक्ता राजकुमार राईले जानकारी दिनुभयो ।
प्रवक्ता राईका अनुसार धरानको शान्तिसुरक्षा मजबुत बनाउन प्रत्येक गौडा र मुख्य बजार क्षेत्रमा पर्याप्त प्रहरी परिचालन गरिएको छ ।
