हरिश ढकाल
बुटवल, १९ साउन । बुटवल उपमहानगरपालिका २ स्थित पाखापानीमा बासुकी नाग देवताको मन्दिर स्थापना गरिएको छ । पाखापानीमा केही महिना अघि नाग देवता प्रकट भएको र मन्दिर निर्माण गर्न आदेश भएकोले मन्दिर निर्माण गरिएको हो । गत माघ २० गते माघे औंसीका दिन प्रकट भएका नाग देवताले आफ्नो स्थान उचित संरक्षण नभएकाले यत्रतत्र भड्किएको भन्ने कुरा बिभिन्न माताजीहरु मार्फत राखेकोले मन्दिर निर्माण गरिएको स्थानिय धु्रव खनालले बताउनु भयो ।
नाग देवता प्रकट भएको ठिक ६ महिनामा साउन २० गते सोमबार नाग पञ्चमी समेत परेकोले सोमवार बिहान ८ बजे उक्त मन्दिरको बिधिवत उद्घाटन गरिने कार्यक्रम रहेको पनि खनालले बताउनुभयो ।
बासुकी नाग सेवा समितिका कोषाध्यक्ष समेत रहेका खनालले उक्त मन्दिरमा दुईवटा नागका मुर्तिहरु स्थापना गरिने र त्यहाँ मन्दिरका लागि जग खन्ने क्रममा नागको प्रस्तर मुर्तिसमेत भेटिएकोले उक्त मन्दिरमा स्थापना गरिएको जानकारी गराउनुभयो ।
मन्दिरमा आउने श्रद्धालु भक्तजनहरुले मागे चिताएको पुग्ने गरेको र बिश्वास नगरि उक्त स्थान वरपर क्षति पुराएमा हानी नोक्सानी हुने गरेको अर्का स्थानीय टेकबहादुर रावलले बताउनु भयो । उक्त मन्दिर समितिका सचिव समेत रहेका रावलले बासुकी नागको स्थापना गर्ने क्रममै प्रत्यक्ष र अप्रत्यक्ष रुपमा बासुकी नाग देवताले दर्शन दिएको र मनोकामना समेत पुरा हुने गरेको प्रतिक्रिया दिनुभयो ।
