कृषि, पर्यटन र उद्योगमा लगानी भित्र्याउने लक्ष
संसार पोष्ट
बुटवल १९ साउन । तिलोत्तमा नगरपालिकाले आगामी असौजमा लगानी सम्मेलन गर्ने भएको छ । असोज ९ र १० गते दुई दिन आयोजना गरिने लगानी सम्मेलनमा कृषि, पर्यटन र उद्योगलाई आधार बनाएर लगानी भित्र्याउने लक्ष्य नगरपालिकाले अगाडी बढाएको छ ।
दुई दिन सम्म संचालन हुने लगानी सम्मेलनमा ५० विदेशी र २ सय स्वदेशी गरी २ सय ५० जना लगानी कर्तालाई सहभागी बनाउने तयारी भैरहेको तिलोत्तमा नगरपालिकाका प्रमुख बासुदेव घिमिरेले जानकारी गराउनुभयो ।
होटल तथा रेष्टुरेण्ट व्यवसायी संघ रुपन्देहीले आईतवार तिलोत्तमा नगरपालिकाको मणिग्राममा आयोजना गरेको नेपाल भ्रमण वर्ष २०२० र लुम्बिनी भ्रमण वर्ष २०७६ लाई सफल पार्न स्थानीय सरकार र होटल व्यवसायीको भूमिका विषयक अन्तरक्रिया कार्यक्रममा नगर प्रमुख घिमिरेले तिलोत्तमा नगरपालिका लगानीको लागि उपयुक्त स्थान र वातावरण छ भन्ने आधार पुष्टि गर्नका लागि लगानी सम्मेलन आयोजना गर्न लागिएको बताउनु भयो ।
नगरपालिका क्षेत्रमा अहिले पनि ६६ प्रतिशत भूभाग खाली रहेकाले कृषि, पर्यटन र अन्य उद्योग स्थापनाका लागि जग्गा प्रशस्त रहेको बताउदै नगर प्रमुख घिमिरेले स्वदेशी तथा विदेशी लगानी कर्तालाई ढुक्कसंग लगानी गर्ने वातावरण मिलाउन आफु लागिपरेको बताउनु भयो । सीमावर्ती क्षेत्र वेलहिया आउंदा नै पर्यटकलाई लुम्बिनी आएको महशुस हुने गरी पुर्वाधार विकास गर्न जरुरी रहेको औल्याउदै प्रमुख घिमिरेले पर्यटक आउने वातावरण व्यवसायीले पनि मिलाउनु पर्नेमा जोड दिनु भयो । उहांले नगरपालिकाको ग्यारेण्टीमा युवाहरुलाई बिना धितो २० लाख सम्म सस्तो व्याजमा क्रण लगानी दिलाउने गरी वित्तिय संस्थासंग सम्झौता गर्ने तयारी गरेको समेत जानकारी गराउनु भयो ।
होटल व्यवसायी संघका प्रमुख सल्लाहकार गोपाल रानाले भौतिक संरचना विना पर्यटन ब्यवसाय फस्टाउन नसक्ने भन्दै पुर्वाधार बिकासमा जोड दिनुपर्ने धारण राख्नु भयो । उहाले लुम्बिनीमा आउने पर्यटक मायादेवि मन्दिर दर्शन गर्नजांदा जुत्ता हराउने गरेको भन्दै यसले पर्यटकमा नकारात्मका सन्देश जाने हुंदा यसतर्फ प्रहरी प्रशासन गम्भिर हुन जरुरी रहेको बताउनु भयो ।
तिलोत्तमा व्यापारसंघका अध्यक्ष जेपी कँडेल र तिलोत्तमा उद्योग बाणिज्य संघका वरिष्ठ उपाध्यक्ष ज्ञानेन्द्र कार्कीले व्यवसायीले पर्यटकलाई गुणस्तरिय सेवा प्रवाह गर्न जरुरी रहेको औल्याउनु भयो ।
होटल व्यवसायी संघ रुपन्देहीका अध्यक्ष समुन्द्र जिसीले भ्रमण वर्षले व्यवसाय फस्टाउने भएकाले व्यवसायीले गुणस्तरिय भोजन, आवास, वोली बचनलाई मिठास र सरसफाईमा बढी ध्यान दिन जरुरी रहेको बताउनु भयो ।
कार्यक्रममा संघका महासचिव माधव कुमार खनाल, तिलोत्तमा संयोजक बसन्त पराजुली लगायतका व्यवसायीले लुम्बिनीलाई धार्मिक स्थल संगै पर्यटकिय हवका रुपमा विकास गर्नु पर्नेमा जोड दिनु भएको थियो ।
