कक्षा १२ को पूरक परीक्षाको मिति निर्धारण

भदौ २२ र २३ गते परीक्षा, ५ भित्र फाराम बुझाउनु पर्ने

संसार पोष्ट

संसार पोष्ट
काठमाडौं, १९ साउन । राष्ट्रिय परीक्षा बोर्डले कक्षा १२ को ग्रेड वृद्धि (पूरक) परीक्षाको मिति आगामी भदौ २२ र २३ गतेलाई निर्धारण गरेको छ । परीक्षा बिहान ११ बजेदेखि २ बजेसम्म हुने परीक्षा बोर्डले जनाएको छ ।
ग्रेड वृद्धिका लागि विद्यार्थीले दुईवटा बिषयमा मात्र परीक्षा दिन पाउने छन् भने परीक्षाको पहिलो दिन अनिवार्य अंग्रेजी बिषयको परीक्षा हुने छ । बोर्डका अनुसार एक विषयमा मात्र परीक्षा दिने परीक्षार्थीहरूले पनि सोहिदिन परीक्षा दिन सक्ने छन् ।
दुई विषयमा परीक्षा दिनेहरूका लागि भने पहिलो दिन सानो कोड नम्बर रहेको विषयको परीक्षा हुनेछ भने दोस्रो दिन ठूलो कोड नम्बर रहेको विषयको परीक्षा हुनेछ ।
ग्रेड वृद्धिका लागि परीक्षा दिने परीक्षार्थीहरूले विद्यालयका प्रधानाध्यापकबाट प्रमाणित गराई विद्यालयमार्फत भदौ ५ गतेसम्म फारम बुझाउनु पर्नेछ । यसैगरी परीक्षा दिने विद्यार्थीहरूले प्रति विषय ६ सयको दरले भदौ २ गतेभित्र बुझाइसकेको भौचर संलग्न हुनुपर्नेछ । फारमसँगै कक्षा १२ को ग्रेड सिटको प्रतिलिपि वेबसाइटबाट डाउनलोड गरी बुझाउनु पर्ने परीक्षा बोर्डले जनाएको छ ।
ग्रेड वृद्धिका लागि परीक्षार्थीहरूले अन्य सबै विषयमा सि प्लस वा सोभन्दा माथि ग्रेड आएर बाँकी दुई विषयमा मात्र सि वा डि प्लस आएमा परीक्षा दिन पाउने छन् । यस्तै कुनै एक वा दुई विषयमा अनुपस्थित भएकाहरूको परीक्षा पनि सोही दिन हुनेछ ।
परीक्षाफल रद्द भएका र ्शैक्षिक योग्यता प्रमाण पत्र लिईसकेका विद्यार्थीहरू भने ग्रेड वृद्धि परीक्षामा समेल हुन पाउने छैनन् । परीक्षार्थीले तोकिएको केन्द्रबाट मात्रै परीक्षा दिनुपर्ने ब्यवस्था गरिएको भएपनि बोर्डले परीक्षाको केन्द्र भने तोकिसकेको छैन ।