बुटवल । होटल पौवाले होटलको ७ औं स्थापना दिवस बिबिध कार्यक्रम गरेर मनाएको छ । देशभर ११ वटा शाखा रहेको पौवाले सबै शाखाहरुमा छुट्टाछुट्टै कार्यक्रम राखेर स्थापना दिवस मनाएको होटेल पौवाका अध्यक्ष दुर्गाप्रसाद भण्डारीले बताए ।
अध्यक्ष भण्डारीका अनुसार सामाजिक उत्तरदायित्व अन्तर्गत पौवाको प्रधान कार्यालय सहित बुटवल शाखाले बुटवलको योगीकुटीबाट प्रभातफेरि सहित लुम्बिनी प्रादेशिक अस्पताल पुगेर बिरामीहरुलाई फलफुल वितरण गरेको छ । यस्तै भैरहवा शाखाले पनि गल्लामण्डी स्थित शाखाबाट प्रभातफेरि सहित भीम अस्पताल पुगेर बिरामीहरुलाई फलफुल वितरण गरेको छ ।
लुम्बिनी प्रादेशिक अस्पतालमा पौवाका अध्यक्ष भण्डारी, संचालक गणेश पोखरेल, लगानीकर्ता केशव न्यौपाने लगायतले फलफुल वितरण गरेका थिए । भैरहवा स्थित भीम अस्पतालमा संचालक हरि थापा सहितको टोलीले फलफुल वितरण गरेको थियो भने पाल्पा शाखाले लुम्बिनी मेडिकल कलेजको प्रसुती वार्डमा भर्ना भएका आमाहरुलाई फलफुल वितरण गरेको छ ।
त्यसैगरि पोखरा शाखाले ¥याली सहित मानवसेवा आश्रम पुगेर त्यहाँ आश्रितहरुलाई फलाहार भोजन गराएर स्थापना दिवस मनाएको छ । गुल्मीको रेशुङ्गा र कपिलवस्तुको गोरुसिङ्घे शाखाले स्थानीय मन्दिर र सार्वजनिकस्थलको सरसफाई गरेर स्थापना दिवस मनाएको पौवाले जनाएको छ । पौवाको भालुवाङ शाखाले निलसागर आश्रममा आश्रितहरुलाई फलाहार भोजन, घोराही शाखाले राप्ती स्वास्थ्य विज्ञान प्रतिस्ठानको मोडिकल वार्डका विरामीलाई फलफुल वितरण तथा धनगढी शाखाले सेती प्रादेशिक अस्पतालमा भर्ना रहेका बिरामीलाई फलफुल वितरण गरेर स्थापना दिवस मनाएको पौवाका ब्राण्ड विभाग प्रमुख विष्णु भण्डारीले बताए ।
उनका अनुसार जुम्ला शाखाले कर्णाली स्वास्थ्य विज्ञान प्रतिस्ठानको प्रसुती वार्डमा फलफुल वितरण गरेको छ । स्थापना दिवस मनाउन पौवामा आवद्ध कर्मचारी, लगानीकर्ता र शुभचिन्तकहरु नेपाली खना हाम्रो गौरव, नेपाली खानामा नेपाली उत्पादन प्रयोग गरौं, नेपाली पोशाक हाम्रो पहिचान, म नेपाली खाना मन पराउँछु, म नेपाली उत्पादन प्रयोग गर्छु जस्ता नारा लेखिएका प्लेकार्ड बोकेर प्रभातफेरिमा निस्केका थिए ।
पौवाले अघिल्लो साता मात्र आफ्नो एघारौं शाखा पोखरामा उदघाटन गरेको र १२औं शाखा काठमाडौंको गौशालामा खोल्ने तयारी पुरा भएको होटलका अध्यक्ष भण्डारीले जानकारी दिए । उनका अनुसार १० वर्षमा १०० शाखाको अभियानमा पौवा अगाडि बढिरहेको छ ।
