बुटवल । बुटवल उपमहानगरपालिकाले कुकुरहरुको बन्ध्याकरण शुरु गरेको छ । बुटवल उपमहानगरपालिकाभित्र सडकमा कुकुरहरुको संख्या वृद्धि नहोस् र रेबिज रोग फैलिन नदिन बन्ध्याकरण तथा रेबिजविरुद्धको खोप लगाउन थालिएको हो ।
बुटवल उपमहानगरपालिकाको आयोजना र वातावरण तथा सामाजिक परिवर्तनका लागि युवासँगको सहकार्यमा मंगलवारदेखि बुटवलमा कुकुर बन्ध्याकरणको ३ दिने अभियान शुरु भएको हो ।
सडकका कुकुरहरुको बन्ध्याकरणले कुकुरको संख्या वृद्धि रोकिने बुटवल उपमहानगरपालिकाका प्रमुख प्रशासकीय अधिकृत टेकराज पन्थीले बताए । कुकुर पाल्नेहरुले सार्वजनिक स्थलमा दिसापिसाब गराएको पाइएमा उनीहरुलाई कारबाही गर्ने र आगामी वर्षदेखि बुटवलमा कसैले कुकुर पाल्न चाहेमा अनुमति लिनुपर्ने व्यवस्थाका लागि उपमहानगरपालिकाले कानून बनाइरहेको उनले बताए । प्रमुख प्रशासकीय अधिकृत पन्थीका अनुसार सबैतिरबाट सहज पहुँच भएकाले बुटवलमा छाडा चौपाया र कुकुरहरुको संख्या बढ्दै गएकाले यसलाई रोक्नका लागि बन्ध्याकरण अभियान थालिएको हो ।
बुटवल उपमहानगरपालिकाका प्रवक्ता तथा वडा नं १५ का अध्यक्ष शिव रानाले अभियानका क्रममा बुटवलका १९ वटै वडाका सामुदायिक कुकुरहरुको बन्ध्याकरण गरिने बताए । बन्ध्याकरणपछि बुटवलमा सामुदायिक कुकुरहरुको संख्या वृद्धि रोकिने उनले बताए ।
बुटवल उपमहानगरपालिकाका पशुपंक्षी विकास शाखाका प्रमुख झविन्द्र बञ्जाडेले बुटवलभित्र कुकुरको संख्या बढ्दै गएकाले संख्या वृद्धि हुन नदिन बन्ध्याकरण गरिएको बताए । उनले ३ दिनसम्म चल्ने बन्ध्याकरण कार्यक्रममा बुटवलका सबै वडाहरुबाट कुकुर संकलन गरिने बताए ।
