बुटवल । बुटवलमा सम्पन्न प्रथम मेयर कप तथा पाचौँ राष्ट्रिय खुला लन टेनिस प्रतियोगिता २०७९ को पुरुष÷महिला एकल तर्फको उपाधि प्रदिप खड्का र अभिलाषा विष्टले जितेका छन् । बुधबार भएको पुरुष तर्फको फाईनल खेलमा बुटवलका रितिक रानालाई ६–३, ६–३, ६–२ को सेटमा जित निकाल्दै प्रदिपले उपाधि चुमे ।
महिला सिंगलको उपाधि अभिलाषा बिष्टले चुमिन् । विष्टले माहिका रानालाई फाईनलमा ६–२, ६–० को सोझो सेटमा पराजित गर्दै उपाधि आफ्नो नाममा लेखाईन । प्रतियोगिताको पुरुष÷महिला सिंगल तर्फ उपाधि विजेतालाई नगद ६० हजार रुपैयाँ, कप, मेडल र प्रमाणपत्र तथा उपविजेताले नगद ३० हजार रुपैयाँ, कप, मेडल र प्रमाणपत्रबाट पुरस्कृत गरिएको छ ।
यसैगरि ३५ वर्ष उमेर समूह पुरुष एकलको उपाधि सन्तोष खत्रीले चुमे । बुधबार भएको फाईनल खेलमा खत्रीले सिमान्त गुरुङलाई ६–२, ७–५ को सेटमा पराजित गर्दै उपाधि जिते ।
यसैगरि ५५ वर्ष उमेर समूह पुरुष एकलको उपाधि बिमल गुरुङले हात पारेका छन् । फाईनलमा कमल थापालाई ६–३, ६–३ को सेटमा पराजित गर्दै गुरुङले उपाधि चुमे ।
एक कार्यक्रमका बिच फाईनल प्रतियोगिताका विजेता, उपविजेता खेलाडीहरुलाई बुटवल उपमहानगरपालिकाका नगरप्रमुख खेलराज पाण्डे, श्री २२ नं. बाहिनीका उपरथी नवराज गुरुङ, नेपाल टेनिस संघका निवर्तमान अध्यक्ष मनोज शम्सेर राणा, रुपन्देही लनटेनिस संघका अध्यक्ष गोपाल ज्ञवाली, उपाध्यक्ष डा. मनोज ढुंगाना, निवर्तमान अध्यक्ष सन्जय प्रकाश श्रेष्ठ, सल्लाहकार मनोज बस्नेत, संघका सचिव सब्बर मियाले पुरस्कार वितरण गर्नु भयो ।
