प्रकोप व्यबस्थापन समितिको प्रदेश स्तरीय भेला

मन्त्री नआएपछि सामुहिकरुपमा भेलाको उद्घाटन

तिलोत्तमा÷बुटवल, १४ साउन । प्रदेश पाँचमा प्रकोप व्यवस्थापनका क्षेत्रमा कार्यरत प्रकोप व्यबस्थापन समितिका अध्यक्ष तथा प्रतिनिधिहरुको भेला बुटवलमा सुरु भएको छ ।
प्रकोप व्यवस्थापनमा देखिएका समस्या र समाधानका सवालमा छलफल गर्नकालागि अन्तरक्रिया कार्यक्रम आयोजना गरिएको हो । सामुदायिक प्रकोप व्यबस्थापन समितिको राष्ट्रिय सञ्जाल नेपालले आयोजना गरेको दुई दिने अन्तरक्रिया कार्यक्रममा प्रदेश पाँचका आन्तरिक मामिला तथा कानुन मन्त्री कुलप्रसाद केसी आउने कार्यक्रम तय थियो । निर्धारित समयभन्दा धेरै ढिला सम्म नआएपछि कार्यक्रमका अतिथिहरुले सामुहिक रुपमा उद्घाटन गरेका हुन् ।
कार्यक्रममा प्रकोप व्यवस्थापनमा संघ सस्थाले गर्ने प्रयास, संघीय सरकार, प्रदेश सरकार र स्थानीय तहबाट भईरहेका सहयोग, कानूनी व्यवस्था लगायतका सम्वन्धमा छलफल भएको थियो ।
बिकास तथा प्रकोप व्यवस्थापन केन्द्र, सेभ द चिल्डेन बुटवल र इन्द्रेणी ग्रामिण बिकास केन्द्रको सहयोगमा २ दिन चल्ने अन्तरक्रिया कार्यक्रममा प्रदेश पाँचका १२ वटै जिल्लाका प्रकोप व्यबस्थापन समितिका प्रतिनीधि सहभागि थिए ।
कार्यक्रममा आन्तरिक मामिला तथा कानुन मन्त्रालयका सचिव केशव आचार्यले प्रकोप व्यबस्थापनकालागि प्रदेश सरकार र स्वयम मन्त्रालय गम्भिर भएर लागेको बताउनु भयो । उहाँले प्रकोप व्यबस्थापनकालागि सरकार मात्रै नभएर समुदाय पनि गम्भिर बन्नुपर्ने भनाई राख्नुभयो ।
प्रकोप व्यवस्थापन समिति राष्टिय सञ्जालका अध्यक्ष जगन्नाथ कुर्मीको अध्यक्षतामा भएको कार्यक्रममा प्रदेश सूचना केन्द्रकी प्रतिनीधि लक्ष्मी कोईराला, नेपाल रेडक्रस सोसाइटी रुपन्देहीका अध्यक्ष प्रेमलाल उदास, सेभ द चिल्डेनका अस्विर सारु, युएनएमएनका सुरज सुनार, राष्ट्रिय सञ्जालका उपाध्यक्ष नवराज गौतम, प्रदेश तदर्थ समितिका संयोजक साहबुद्धिन देवान, नेपाली सेनाका सेनानी रमेशजंग कुवँर लगायतले सम्भावित विपद न्यूनिकरणकालागि सरकारले प्रयाप्त ध्यान दिन नसकेका कारण वर्षेनी विपद आईरहेको भनाई राख्नुभएको थियो ।
त्यस अवसरमा बिकास तथा प्रकोप व्यवस्थापन केन्द्रका कार्यकारी निर्देशक धर्मराज घिमिरेले प्रकोप व्यबस्थापनको क्षेत्रमा देखिएका समस्या र समाधानका बिषयमा कार्यपत्र प्रस्तुत गर्नुभएको थियो ।
भेलाले प्रदेश स्तरीय सञ्जाल गठन गर्ने र प्रकोप व्यबस्थापनका क्षेत्रमा देखिएका समस्या र समाधानका बिषयलाई समेटेर प्रतिवेदन तयार गरि प्रदेश पाँचका मुख्यमन्त्री शंकर पोखरेललाई ज्ञापन पत्र बुझाईने राष्ट्रिय सञ्जालका अध्यक्ष कुर्मीले जानकारी दिनुभयो ।