तिलोत्तमा, वैशाख २२ । नेकपा एमालेले तिलोत्तमा नगरपालिका वडा नं. १० स्थित सेमराबजार स्वास्थ्य चौकीलाई अस्पतालको रुपमा स्तरोन्नती गर्ने निर्णयलाई कार्यान्वयनमा ल्याउने जनाएको छ । स्थानीय निर्वाचनको सन्दर्भमा पार्टीको तिलोत्तमा नगर कमिटीले जारी गरेको प्रतिबद्धता पत्रमा सेमराबजार स्वास्थ्य चौकीलाई १५ शैंयाको अस्पतालमा स्तरोन्नती गर्ने निर्णयलाई कार्यान्वयनमा ल्याइने उल्लेख गरेको हो ।
एमालेको तर्फबाट नगर उपप्रमुखकी उम्मेदवार जागेश्वरी चौधरीले सेमराबजार स्वास्थ्य चौकीलाई अस्पतालमा रुपान्तरण गर्ने विषयलाई पार्टीले उच्च प्राथमिकता दिएको बताउनुभयो । उहाँले नगरमा हाल दुई ठाउँमा अस्पताल निर्माणको क्रममा रहे पनि सेमरामा नयाँ अस्पताल बन्ने स्पष्ट पार्नुभयो ।
तिलोत्तमा नगरपालिकामा हाल १५ शैंयाका दुई अस्पताल निर्माणको क्रममा छन् । वडा नं. ६ को आनन्दवन स्वास्थ्य चौकीलाई १५ शैंयाको अस्पतालमा स्तरोन्नती गर्न ठेक्का सम्झौता भएर निर्माण कार्य अघि बढेको छ । यस्तै वडा नं. १७ मा रहेको बीपी ग्राममा समेत १५ शैंयाको अस्पताल निर्माण गर्न ठेक्का सम्झौता भएर निर्माण कार्य अघि बढेको छ ।
सेमरबजार स्वास्थ्य चौकीमा हाल रोटरी क्लवसँगको सहकार्यमा प्रसुति सेवा केन्द्र समेत सञ्चालनमा रहेको छ भने बर्थिङ्ग सेन्टर र एम्बुलेसन्स सेवा पनि रहेको छ । जनप्रतिनिधि आएसँगै तिलोत्तमाका सबै वडामा सरकारी स्वास्थ्य संस्था पुगेका छन् ।
एमालेले आफ्नो प्रतिबद्धता पत्रमा स्वास्थ्य बीमालाई सबै नागरिकको पहुँचमा पुर्याउने, प्रदेशिक मेडिकल कलेजको निर्माण एवं सञ्चालनका लागि नेपाल सरकारसँग आवश्यक समन्वय र पहल गरिने, स्वास्थ्य चौकी र स्वास्थ्य केन्द्रलार्ई सुविधायुक्त बनाइ तिनको स्तर वृद्धि गरिने उल्लेख गरेको छ । आवश्यकतानुसार जनतालाई सहज र सुपथ मूल्यमा औषधी उपलब्ध गराउने पसलहरूको सञ्चालन नगरपालिका आफैले गर्ने कार्यका लागि पहल गरिने पनि एमालेको प्रतिबद्धता पत्रमा उल्लेख छ ।
यस्तै सुत्केरी, जेष्ठ नागरिक घुम्ती सेवा, नवजात शिशु स्वास्थ्यमा विशेष ध्यान दिइने, पोषण कार्यक्रम सञ्चालनलाई निरन्तरता दिइने, बालबालिकाका लागि खोप सेवा र गर्भवती तथा सुत्केरी महिलालाई पोषणसहितको सुविधा उपलब्ध गराउने कार्यलाई थप प्रभावकारी बनाउने पनि एमालेको प्रतिबद्धता छ । प्रत्येक वार्डमा दक्ष नर्ससहितको चौबिसै घण्टा प्रसूति सेवा उपलब्ध गराइने एमालेको प्रतिबद्धता छ ।
