बुटवल, ६ पुस । रुपन्देहीको बुटवल–११ देविनगरमा लुम्बिनी प्रदेश स्तरीय ‘सी’ लेभल पुरुष डबल्स ब्याडमिन्टन प्रतियोगिता हुने भएको छ । देविनगरको ओलीपथ स्थित ब्याडमिण्टन कभर्ड हलमा यहि पुस ९ र १० गते दुई दिनसम्म सञ्चालन हुने प्रतियोगितामा ए र बी लेभलका खेलाडी तथा भेट्रान्स खेलमा विजेता, उप विजेता र तृतीय भएका खेलाडीहरुलाई सहभागि नगराईने भएको छ ।
बुटवलको आशिष स्टेशनरी तथा स्पोर्टस् हाउसको आयोजनामा हुने प्रथम ‘आशिष कप ब्याडमिन्टन’ मा लायन्स क्लब अफ बुटवल स्टारले पनि सहयोग गरेको छ । प्रतियोगितामा प्रथम हुने टिमले नगद ३० हजारसहित मेडल, शिल्ड र प्रमाणपत्र प्राप्त गर्ने छन् । यसैगरी द्वितीय हुनेलाई २० हजार तथा तृतीयलाई १५ हजार नगद राशीसहित मेडल र प्रमाणपत्रले सम्मान गरिने आयोजकले जनाएको छ ।
प्रतियोगिता बारे जानकारी गराउन मँगलबार आयोजित पत्रकार सम्मेलनमा बोल्दै आयोजक संस्थाका अध्यक्ष आयुष श्रेष्ठले उत्कृष्ट खेलाडी, अनुशासित खेलाडी र उदयमान खेलाडीलाई समेत विशेष पुरस्कारसहित मेडल र प्रमाणपत्रले सम्मान गरिने बताउनु भयो । उहांका अनुसार प्रतियोगितामा टप ८ मा पर्न सफल टिमलाई विशेष पुरस्कारको व्यवस्था गरिएको छ ।
लुम्बिनी प्रदेशभरीका खेलाडी सहभागी हुने प्रतियोगिताका लागि प्रति टिम २ हजार ५ सय रुपैयाँ शुल्क तोकिएको छ । सहभागि खेलाडीहरुलाई खाना, नास्ता, टिशर्ट र मायाको चिनोको व्यवस्था आयोजकले गर्ने छ । प्रतियोगितामा मुख्य एम्पायरका रुपमा अर्जुन कार्की र सहायक अम्पायरमा प्रमोद पहाडी रहनुभएको छ ।
