संसार पोष्ट
तिलोत्तमा, ११ साउन । तिलोत्तमा क्रिकेट प्रिमियर लिग २०७६ को तेस्रो संस्करण आगामी असोज २५ गतेदेखि हुने भएको छ । आयोजक संस्था तिलोत्तमा क्रिकेट विकास समितिले शनिबार पत्रकार सम्मेलन गरेर प्रतियोगिताको आवश्यक तयारी शुरु भएको जानकारी गराएको हो ।
पत्रकार सम्मेलनमा आयोजक तिलोत्तमा क्रिकेट विकास समितिका अध्यक्ष अच्युत ढुंगानाले प्रदेश स्तरिय हुने प्रतियोगिताको पुरस्कार राशी समेत एक लाख वृद्धि गरिएको जानकारी गराउनु भयो । कार्यक्रम संयोजक दिपक भुर्तेलले प्रतियोगिताको विजेतालाई नगद ४ लाख रुपैयाँ, उपविजेता टिमलाई नगद २ लाखसहित शिल्ड, मेडल र प्रमाणपत्र तथा म्यान अफ दी सिरिजलाई नगद २० हजार र शिल्डबाट पुरस्कृत गरिने बताउनु भयो ।
यस्तै विधागत रुपमा बेष्ट ब्याट्सम्यान र बेष्ट बलरलाई नगद १० हजार र शिल्ड, इमर्जिङ प्लेयरलाई नगद ५ हजार र शिल्ड तथा हरेक प्रतियोगितामा भ्यालुयवर प्लेयर र पचास रन बनाउने खेलाडीलाई नगद १ हजार र शिल्डबाट पुरस्कृत गरिने छ । यसैगरि एक जना टिमलाई टिम फेयर प्ले अवार्ड घोषित गर्दै नगद ४० हजार तथा प्रत्येक खेलमा म्यान अफ दी म्याच घोषित गर्दै नगद एक हजार ५ सयबाट पुरस्कृत गरिने छ ।
आयोजकका अनुसार प्रतियोगिता आयोजनाका लागि कुल २५ लाख खर्च हुने अनुमान गरिएको छ । कार्यक्रममा रुपन्देही जिल्ला क्रिकेट समितिका अध्यक्ष प्रशान्त विक्रम मल्लले प्रतियोगिताको सफलताको शुभकामना ब्यक्त गर्नुभएको थियो ।
