संघीयताको जग बसाल्ने कार्यमा महत्वपूर्ण उपलब्धि : सभामुख घर्ती
बुटवल, २१ माघ । लुम्बिनी प्रदेश सभाले प्रदेश स्थापनाको तेस्रो बार्षिकोत्सव मनाएको छ । बार्षिकोत्सव कार्यक्रमको लुम्बिनी प्रदेशका प्रदेश प्रमुख धर्मनाथ यादवले उद्घाटन गर्नुभएको थियो ।
कार्यक्रममा प्रदेशका सभामुख पूर्णबहादुर घर्तीले प्रदेश सभा स्थापनाको तेस्रो बर्षसम्म आइपुग्दा संघीयताको जग बसाल्ने कार्यमा महत्वपूर्ण उपलब्धि हासिल गरेको बताउनुभयो ।
प्रदेश सरकारका प्रवक्ता भौतिक पूर्वाधार विकास मन्त्री बैजनाथ चौधरीले अन्य प्रदेशको तुलनामा लुम्बिनी प्रदेश धेरै काममा अग्र स्थानमा रहेको दाबी गर्नुभयो । सबै भन्दा पहिले प्रदेश योजना आयोग गठन गरी प्रदेश सरकारले योजनावद्ध विकास अगाडी बढाएको भन्दै उहाँले केन्द्रीय राजनीतिको प्रभाव प्रदेश सरकारमा पर्न नदिने बताउनु भयो ।
प्रदेश सभामा प्रमुख प्रतिपक्षी दलका नेता बिरेन्द्र कानौडियाले जनतालाई समृद्धिको सपना देखाएर सरकारले जनताको आशा र विश्वासमाथि कुठाराघात गरेको आरोप लगाउनुभयो । राजनीतिक स्थायित्व र समृद्धिको नारा दिएर दुई तिहाई नजिकको बहुमत ल्याएको बर्तमान सरकारले मुलुकलाई समृृद्धि र स्थायित्व दिनुको सट्टा असंवैधानिक रुपमा संसद विघटन गरेर संघीय लोकतान्त्रिक गणतन्त्रलाईनै धरापमापार्ने काम गरेको दाबी गर्नुभयो ।
जनता समाजवादी पार्टी संसदीय दलका नेता सहसराम यादवले सन्तुलित विकासको नारा दिएर सरकारले किासमा सन्तुलन कायम गर्न नसकेको बताउनुभयो ।
उपसभामुख कृष्णी थारुको स्वागत मन्तव्यबाट सुरु भएको कार्यक्रममा उत्कृष्ठ पाँच कर्मचारीलाई पुरस्कृत गर्नुका साथै एक कर्मचारीलाई सम्मान गरिएको थियो ।
सो अवसरमा प्रदेश सभा सचिवालयकी कानून अधिकृत सीता घिमिरे, इलेक्ट्रिकल अधिकृत छैठौ, प्रहरी सहायक निरीक्षक टेक बहादुर क्षेत्री, कार्यालय सहयोगिहरु दयाराम बास्तोला र साचा कामीलाई पुरस्कृत गरिएको थियो भने कम्प्युटर अपरेटर विवश बोहोरालाई उत्कृष्ठ कर्मचारी सम्मानबाट सम्मान गरिएको थियो । कार्यक्रममा सभामुख पूर्णबहादुर घर्तीको रचना, शिशिर योगीको संगित र शिशिर योगी तथा सीता आचार्यको स्वर रहेको ‘हाम्रो प्यार्यो प्रदेश लुम्बिनी’ गीति एल्वमको बिमोचन गरिएको थियो ।
विविध साँस्कृतिक झाँकी तथा सांगीतिक प्रस्तुति रहेको कार्यक्रमको सञ्चालन प्रदेश सभा सचिवालयकी कानून अधिकृत सीता घिमिरेले गर्नुभएको थियो ।
