नवलपरासी, ६ साउन । पश्चिम नवलपरासीको सदरमुकाम परासी, बर्दघाट र सुनवल गरी तीन मुख्य बजारमा प्रहरीले सिसी क्यामराबाट निगरानी बढाएको छ ।
सवारी दुर्घटना, सुरक्षा संवेदनशिलता, अपराध अनुसन्धान तथा नियन्त्रणका साथै शान्ति सुरक्षा कायम गराउने उद्देश्यले ३ मुख्य बजारको १८ स्थानमा सिसी क्यामरा जडान गरी सिसी क्यामरा मार्फत निगरानी बढाएको जिल्ला प्रहरी कार्यालय नवलपरासीका सुचना अधिकारी एवम् प्रहरी नायव उपरीक्षक विरेन्द्र थापाले बताउनुभयो ।
थापाका अनुसार प्रदेश ५ सरकारको आन्तरिक मामिला तथा कानुन मन्त्रालयको सहयोगमा उक्त सिसी क्यामरा जडान गरिएको हो । परासी बजारमा ८ वटा, सुनवलमा ५ वटा र बर्दघाट बजारमा ५ वटा गरी १८ वटा सिसी क्यामरा जडान गरिएको छ ।
