बुटवल, १६ भदौ । कोरोना भाईरस (कोभिड–१९) को महामारीबाट प्रभावितहरुका लागि प्रदेश पाँचको अस्थायी राजधानी बुटवलमा ‘फूड बैंक’ सञ्चालन गरिएको छ । रोटरी क्लव अफ बुटवल साउथको अग्रसरतामा मंगलबारदेखि बुटवलको ट्राफिकचोकमा फूड बैंक सञ्चालन गरिएको हो ।
विषम परिस्थितिको अवस्थामा कोही पनि भोकै बस्न नपरोस भन्ने उद्देश्यले सञ्चालन गरिएको फूड बैंकमा हुनेहरुले दिने र नहुनेहरुले लैजाने आग्रह गरिएको छ । सामाजिक सेवामा काम गर्ने संस्थाहरु रोटरी क्लव अफ बुटवल साउथ, रोट्रयाक्ट क्लव अफ बुटवल साउथ, रोट्रयाक्ट क्लव अफ तिनाउ सिटि र ह्याप्पी ह्वील्सको आयोजना तथा साईन रेसुङ्गा डेभलपमेन्ट बैंक, ई–क्यान रुपन्देही र बुटवल महिला जेसिजको सहयोगमा फूड बैंक सञ्चालन गरिएको रोटरी क्लव अफ बुटवल साउथका अध्यक्ष प्रेम भूर्तेलले जानकारी गराउनु भयो ।
पैसाको अभावमा कोही पनि भोकै बस्नु नपरोस भन्ने उद्देश्यले लकडाउन अवधिभर सञ्चालन गरिने फूड बैंकबाट एक पटकमा एक जनालाई २.५ किलो चामल, आधा किलो दाल, १ किलो आलु, आधा लिटर तोरीको तेल, १ किलो प्याज, लसुन, बेसार, अदुवा एक÷एक पाउ, एक किलो नुन, ५ वटा मास्क र साबुन प्रदान गरिने छ ।
विश्वमा महामारीको रुपमा फैलिएको कोरोना भाईरसको संक्रमण फैलिन नदिनकालागि सरकारले गत चैत ११ गतेदेखि देशव्यापी रुपमा लकडाउन गरेको थियो भने त्यसयता स्थानीय तह तथा जिल्ला प्रशासन कार्यालयले लकडाउन गर्दै आएको छ । लकडाउनका कारण उद्योग व्यापार व्यबसाय लगभग ठप्प जस्तै भएको र कतिपयले रोजगारी समेत गुमाउनु परेको छ ।
यस्तो विषम परिस्थितिमा दैनिक ज्याला मजदुरी गरेर खाने वर्ग नराम्रोसंग चपेटामा परेकाले उनीहरुलाई सक्दो राहत पु¥याउन सकियोस भन्ने उद्देश्यले सञ्चालन गरिएको फूड बैंकमा सहयोग प्रदान गरिएको शाईन रेसुङ्गा डेभलपमेन्ट बैंकका प्रमुख कार्यकारी अधिकृत प्रकाश पौडेलले बताउनु भयो ।
नहुनेहरुका लागि नै फूड बैंक सञ्चालन गरिएको र उनीहरुको दैनिक सांझ बिहान हात मुख जोड्न सहजहोस भन्ने आफूहरुको उद्देश्य रहेकाले नहुनेहरुले कुनै संकोच नमानी लैजानकालागि ई–क्यान रुपन्देहीका अध्यक्ष देव कुवँरले आग्रह गर्नुभयो । महामारीको सबैले मिलेर सामना गर्नुपर्ने बताउँदै हेप्पी ह्वील्सका अध्यक्ष सन्तोष केसीले फूड बैंक हुने र नहुने बिचको सहकार्यको एउटा नमुना भएको बताउनु भयो ।
