बुटवल, २ असार । कोरोनाको नाममा भ्रष्टाचार गर्न छोडेर कोरोना महामारीबाट जनतालाइ जोगाउने तर्फ लाग्न नेपाली काँग्रेस रुपन्देहीले सरकारको ध्यानाकर्षण गराएको छ ।
मापदण्ड अनुरुप क्वारेन्टाइन व्यवस्थापन गर्नुपर्ने, पीसीआर जाँचको दायरा बढाउनु पर्ने, कोरोनाको नाममा भइरहेका भ्रष्टाचार बन्द गरी दोषीलाइ कारबाही गर्नुपर्ने लगायतका माग राख्दै नेपाली काँग्रेस रुपन्देहीले आज (मंगलबार) भैरहवामा बिरोध प्रदर्शन गरेको हो । बिपतका बेला जनतालाइ महामारीबाट जोगाउनुको साटो सरकार आफै भ्रष्टाचारमा लिप्त भएको भन्दै प्रमुख जिल्ला अधिकारी मार्फत काँग्रेस रुपन्देहीले प्रधानमन्त्रीलाइ ज्ञापन पत्र पठाएको हो ।
नेपाली काँग्रेस रुपन्देहीका सभापति अब्दुल रज्जाकले प्रमुख जिल्ला अधिकारी महादेव पन्थ मार्फत ज्ञापनपत्र बुझाउदै कोरोना नियन्त्रणगरी जनतालाई विपद्बाट सुरक्षित राख्न सरकार पूर्ण असफल भएको बताउनु भयो । ‘सरकार जनताको अभिभावक हो उसले जनतालाइ कोरोनाबाट जोगाउनुपर्नेमा आफै भ्रष्टाचारमा लिप्त छ । भ्रष्टाचारीलाइ संरक्षण गर्ने खेलमा लागेको छ’ सभापती रज्जाकले भन्नुभयो ।
राष्ट्रिय विपद्को अवस्थामा पनि स्वास्थ्य सामाग्री खरिदमा पटकपटक भइरहेको अनियमितताले आम नागरिकलाई स्तब्ध बनाएको र कमिसनकै कारण स्वास्थ्य सामाग्री आपूर्तिमा समस्या थपिएको सभापति रज्जाकले बताउनुभयो । सबै राजनीतिक दलको निरन्तर साथ र सहयोग पाएपनि कोरोना विरुद्धको अभियानमा सरकारले सक्षम ढंगले नेतृत्व गर्न नसकेको काँग्रेसको आरोप छ ।
कोरोनाले आम नागरिकको जिवनमा परेको आर्थिक संकटलाई कम गर्नेतर्फ सरकार गम्भिर नभएको काँग्रेस रुपन्देहीका सचिव रामकृष्ण खाँणले बताउनु भयो ।
नेपाली काँग्रेसले कोरोना नियन्त्रण अभियानका नाममा सरकारले खर्च गरेको भनेको दश अर्बको हिसाव पनि मागेको छ । स्वास्थ्य सामाग्रीको व्यवस्थापन, क्वारेन्टाइन र आइसोलेसनहरु मापदण्ड अनुरुप संचालन गर्न, क्वारेन्टाइन र आइसोलेसनमा राखिएका सबैलाई पीसीअर परिक्षण गरेर मात्रै घर पठाउनु पर्ने, दश अर्बको खर्च विवरण र अनियमितता बारे छानबिन गरी दोषीलाइ कारबाही गर्न माग गर्दै प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाइएको सचिव खाँणले जानकारी गराउनु भयो । नेपाली काँग्रेसले कोरोनाको जोखिमलाइ मध्येनजर गर्दै स्वास्थ्य सर्तकताका साथ कार्यक्रम सम्पन्न गरेको थियो । बीउबिजन र रासायनिक मलको सहज उपलब्धता, कृषि उत्पादनको बजारको सुनिश्चितता, अनुदानमार्फत कृषक र कृषि क्षेत्रलाई तत्काल सहयोग पु¥याउनुपर्ने, साना, ठूला उद्योग, व्यापार, व्यवसायको संरक्षण र श्रमिक मजदुर तथा उद्यमीहरुको समस्या र हितलाई उच्च प्राथमिकतामा राखी ठोस राहत प्याकेजको घोषणा गर्नुपर्ने काँग्रेसको माग छ ।
भैरहवास्थित काँग्रेसको जिल्ला पार्टी कार्यालयबाट सुरु भएको व्यानर र प्लेकार्ड सहितको ¥याली बैंकरोड, मिलनचोक हुँदै जिल्ला प्रशासन कार्यालय पुगेर ज्ञापन पत्र बुझाइएको हो । ¥यालीमा सहभागि नेता कार्यकर्ताहरुले बाँच्नेहरुमा हाहाकार, मृत्युपछि पीसीआर, आरडिटी खारेज गर, पीसीआरको दायरा बढाउ लगायतका नारा तथा प्लेकार्ड लिएर प्रशासन पुगेका थिए ।
