श्यामलाल पोखरेल
बुटवल, १५ जेठ । बुटवलको मैनानगरमा सञ्चालित धनबर्षा बचत तथा ऋण सहकारीले आयोजना गरेको रक्तदान कार्यक्रममा ४५ जनाले रक्तदान गरेका छन् । सहकारीले बिहीबार बुटवलस्थित रक्तसञ्चार सेवा केन्द्रमा रक्तदान कार्यक्रमको आयोजना गरेको थियो ।
कोरोना महामारीको बेला रगत अभाव हुन नदिने गरी रक्तदान कार्यक्रमको आयोजना गरिएको कार्यक्रम संयोजक रामबहादुर शाहीले जानकारी गराउनु भयो । वार्षिक कार्यक्रम अनुसार बेलाबेला रक्तदान गर्दै आएको सहकारीले अहिले कोरोना भाइरस संक्रमणका बिरुद्व रक्तदान गरिएको सहकारीका कोषाध्यक्ष खेमराज आचार्यले बताउनु भयो । सहकारीले कोरोना भाईरसका कारण लकडाउन भएपछि शेयर सदस्यहरुको स्वास्थ्यलाई ख्याल गरी कोराना विमा र व्याज छुट गरेको छ ।
६ सय ५५ जना शेयर सदस्य र ४५ जना बालबालिकाको कोराना विमा गर्नुका साथै १० देखि १२ प्रतिशत ब्याज छुट गरेको छ । धनवर्षा बचत तथा ऋण सहकारीले गत चैत्र महिनादेखि आगामी असार मसान्तसम्मका लागि १० देखि १२ प्रतिशत व्याज छुट गर्ने निर्णय गरेर कार्यान्वयन गरिएको निवर्तमान अध्यक्ष दिनेश पाण्डेले जानकारी गराउनु भयो । सहकारी सञ्चालनको प्रमुख उद्देश्य कमजोर आर्थिक अवस्था भएका नागरिकलाई आर्थिक रुपले आत्मनिर्भर बनाउने भएकाले शेयर सदस्यहरुका लागि व्याज छुट र कोरोना विमा गराइएको सहकारीका सचिव रमेश गुरुङले बताउनु भयो ।
