कोरोना बिरुद्ध टोलटोलमा विलचिङ पाउडर प्रयोग

श्यामलाल पोखरेल

बुटवल, ३ बैशाख । कोरोना भाइरसको संक्रमणबाट जोगिनका लागि नागरिकले हरेक प्रयास गर्दै आएका छन् । सरकारको निर्देशन अनुसार लकडाउनको पालना गरी घरमै बसेकाहरुले पनि कोरोनाबाट जोगिनका लागि आआफ्नै प्रयास गर्ने गरेका छन् । अहिले गाउँ शहरमा कोरोनाको सम्भावित सँक्रमणबाट बच्नका लागि सरसफाइ र किटनासक औषधी सडकदेखि घरआगनमा छर्कन थालिएको छ । तिलोत्तमा नगरपालिकाको विभिन्न टोल वस्तीमा कोरोना बिरुद्व विलचिङ पाउडर छर्कन थालिएको हो ।
बुधबार तिलोत्तमा वडानम्बर २ को शान्तिकुञ्ज पथको टोल वस्तीमा विलचिङ पाउडर छर्किएको छ । स्थानीय टोलवासीले आफ्नो सुरक्षा आफै गरौं भन्दै सडकदेखि घरको गेट र आँगनमा विलचिङ पाउडर छर्किएका छन् । कोरोनाको संक्रमणबाट आफु पनि बच्न र अरुलाइ पनि बचाउनु पर्छ भन्ने सन्देश दिने गरी किटनासक औषधीको रुपमा विलचिङ पाउडर छर्किएको स्थानीय भिमलाल भुसालले बताउनु भयो । आफ्नो सुरक्षाको लागि टोलवासीको आआफ्नो लगानीमा विलचिङ पाउडर खरिद गरी प्राविधिकको सहयोगमा छर्किएको लोकनाथ ज्ञवालीलले जानकारी गराउनु भयो ।
लगातार लकडाउन भएपनि विश्वभर फैलिएको कोरोना भाइरस संक्रमणमा कमी नआएपछि विलचिङ पाउडर छर्किन थालिएको हो । यतिबेला खानपिनमासमेत सर्वसाधारण नागरिकले सचेतता अपनाउन थालेका छन् ।