सैनामैना, २२ चैत । लकडाउनको बेला सबै मानिस घर भित्रै बसेको मौका छोपेर स्थानीय खोलामा अवैधरुपमा नदिजन्य पदार्थ निकासी गरेका दुई ट्याक्टरलाई सालझण्डी प्रहरीले नियन्त्रणमा लिएको छ ।
रुपन्देहीको सैनामैना वडा नं. ५ गढवा स्थित तुलबुलिया खोलाबाट अवैध रुपमा नदिजन्य पदार्थ उत्खनन् गरि निकासी गर्ने क्रममा दुई ट्याक्टरलाई प्रहरीले शनिवार खोलाबाटै नियन्त्रणमा लिएको हो ।
इलाका प्रहरी कार्यालय सालझण्डीका प्रहरी निरिक्षक कमल परियारका अनुसार लु ४ त ५२५३ र लु ३ त २८८२ नम्बरको ट्याक्टरलाई नदिजन्य पदार्थ सहित नियन्त्रणमा लिईएको हो । नियन्त्रणमा लिइएका ट्याक्टरले स्थानीय सरकार सञ्चालन ऐन, २०७४ को दफा ११ को उपदफा (२) (घ) विपरित नदिजन्य पदार्थ उत्खनन् गरेकाले सोही अनुसार कारवाही प्रक्रिया अगाडी बढाइने प्रहरी निरिक्षक परियारले वताउनु भयो ।
