भैरहवा, १८ चैत । भैरहवा स्थित भीम अस्पतालमा ३५ बेडको आइसोलेशन कक्ष बनाईएको छ । कोरोना भाइरस संक्रमितहरुलाई उपचार गर्ने तरिकाले अस्पताल भित्र बनाइएको आइसोलेशन कक्षमा भेण्टिलेटर र आईसियु गरी ३४ वटा बेड राखिएको छ ।
सुविधा सम्पन्न आईसोलेशन कक्षमा ३ वटा भेन्टिलेटर र ५ वटा आईसियु सहित ३५ वटा वेड राखिएको छ ।
भीम अस्पताल र अस्पताल भित्र बनाइएको आइसोलेशन कक्षको मंगलवार निरिक्षण गर्दै सामाजिक विकास मन्त्री सुदर्शन बरालले विरामीको उपचारमा कुनै कमी हुन नदिन स्वास्थ्यकर्मीहरुलाई निर्देशन दिनुभएको छ । सरकारले स्वास्थ्यकर्मीको सुरक्षाको लागि कुनै कसर बाँकी नराखेको बताउदै मन्त्री वरालले उच्च मनोवलकासाथ उपचारमा खटिन स्वास्थ्यकर्मीहरुलाई आग्रह गर्नुभयो ।
मन्त्री बरालले लुम्बिनी प्रादेशिक अस्पताल लगायत कोरोना विशेष अस्पतालमा चिकित्सक तथा स्वास्थ्यकर्मीलाई आबश्यक पर्ने पिपिई, मास्क लगायतका स्वास्थ्य सामाग्री आबश्यकता अनुसार उपलब्ध गराएको बताउंदै स्वास्थ्य सामाग्रीमा कुनै कमी हुन नदिने बताउनु भयो ।
