बुटवल, १७ चैत । बुटवल धागो कारखानामा रहेको कोरोना विशेष अस्पतालमा मृत्यु भएका ३४ वर्षिय युवकको स्वाब परीक्षण नतिजा कोरोना ‘नेगेटिभ’ आएको छ । पहिलो परिक्षणको टेष्टमा नेगेटिभ रिपोर्ट आएपछि उनको स्वाव पुन दोस्रो पटक परिक्षण गरिएको थियो ।
स्वास्थ्य तथा जनसंख्या मन्त्रालय स्रोतकाअनुसार राष्ट्रिय जनस्वास्थ्य प्रयोगशालामा भएको दोश्रोे टेष्टमा पनि उनमा कोरोना नेगेटिभ देखिएको हो । मृतक बिरामी अवस्थामा उच्च शंकास्पद भएकाले दोस्रो पटक स्वाव परिक्षण गरिएको थियो ।
बुटवल कोरोना विशेष (अस्थायी) अस्पतालको आइसोलेसन वार्डमा भर्ना गरिएका ती युवकको आइतबार मृत्यु भएको थियो ।
उनी यही चैत ६ गते दुबईबाट काठमाडौं आएका थिए । काठमाडौंबाट बस चढेर चैत ७ गते उनी रुपन्देहीको सैनामैना ४ सिसौडांडामा रहेका परिवारको सम्पर्कमा आएका थिए । घर फर्केको केही दिनपछि ज्वरो आउन थालेपछि उनलाई घर नजिकैको मेडिकलमा लगिएको थियो । मेडिकलको औषधि खाँदासमेत निको नभएपछि उनलाई छिमेकीले मुर्गियाको पर्रोहा स्वास्थ्यचौकीमा लगेका थिए । स्वास्थ्य चौकीले उनमा कोरोना संक्रमणको लक्षण देखापरेको भन्दै कोरोना विशेष अस्पताल बुटवल लैजान सुझाव दिएको थियो । स्वास्थ्य चौकीको सुझाव अनुसार उनी चैत १३ गते बुटवल आएका थिए ।
चैत १३ गतेदेखि कोरोना अस्पतालको आइसोलेशनमा रहेका उनको स्वास्थ्य अवस्था बिग्रिँदै गएपछि आइसीयूमा राख्ने तयारी हुँदैगर्दा उनको आइतबार दिउँसो मृत्यु भएको हो ।
तर मृत्यु पछि आएको उनको स्वाव परिक्षण रिपोर्टमा कोरोना नेगेटिभ देखिएको लुम्बिनी प्रादेशिक अस्पतालका मेडिकल सुपरिटेण्डेण्ट राजेन्द्र खनालले बताउनुभयो । मृतकको स्वावको पहिलो परिक्षणमा कोरोना नेगेटिभ देखिएपछि दोश्रो परिक्षण गरिएकोमा दोश्रो रिपोर्टमा पनि कोरोना नेगेटिभ देखिएको लुम्बिनी प्रादेशिक अस्पतालका मेसु खनालले बताउनुभयो ।
यसअघि नेपालमा ५ जनामा कोरोना भाइरसको संक्रमण भएको पुष्टि भएपनि एकजना उपचारपछि निको भएर घर फर्किईसकेका छन् भने चारजना विभिन्न कोरोना विशेष अस्तालमा उपचाररत रहेका छन् ।
