रोहिणीले पालिकासंग सिमा जोडिएका नाका बन्द गराउदै

भैरहवा, ९ चैत । रुपन्देहीको रोहिणी गाउँपालिकाले भारतसित सिमा जोडिएका नाकाबाट हुने आवागमन सोमबारदेखि बन्द गर्ने जनाएको छ । भारतीय नागरिक नेपाल आउने र नेपाली नागरिक भारतीय बजारमा जाने गरेका कारण गाउँपालिकाका जनता कोरोनाको जोखिममा पर्न सक्ने भन्दै पालिकासंग सिमा जोडिएका नाका बन्द गर्न लागेको गाउँपालिका अध्यक्ष सनोज कुमार यादवले जानकारी दिनुभयो ।
रोहिणी गाउँपालिकाका ५ वटा वडाहरु भारतसित जोडिएर रहेकाले गाउँपालिकाले आफ्नो पालिका अन्तर्गत पर्ने नाकाबाट हुने आवागमन वन्द गर्न लागेको हो । गाउँपालिकाले गरेको यो निर्णयबाट रोहिणी गाउँपालिकासंगै ओमसतिया गाउँपालिका र देवदह नगरपालिकाका जनतामा पनि यसको जोखिम कम हुनेछ । यी तिनवटै पालिकाहरुको मूख्य बजार भनेकै भारतको भगवानपुर बजार हो । भारतमा कोरोनाको उच्च जोखिम देखिएकोले आईतबार देखि त्यहांको सरकारले जनता कफ्र्युको आग्रह गरेको छ । जसले गर्दा अहिले सिमावर्ती बजारहरु सुनसान बनेका छन् ।
बिगत १५ दिन देखि सिमा नाकामा हेल्प डेस्क राखी नेपाल प्रवेश गर्नेहरुको स्वास्थ्य चेकजाँच गर्दै आएको गाउँपालिकाले सोमबार देखि उक्त क्याम्प गाउँपालिकाकै सदरमुकाम धकधईमा सार्ने अध्यक्ष यादवले बताउनुभयो । अध्यक्ष यादवले अबका दिनमा गाउँपालिकामा पनि उच्च सतर्कता अपनाउने जनाउनुभएको छ ।
गाउँपालिकामा आउने सेवाग्रहीका साथै गाउँपालिकावासीलाई यस विषयमा बिभिन्न सचेतनामूलक कामहरु गरिनुका साथै सर्वसाधारणको स्वास्थ्य चेकजाँच देखि शंकास्पदलाई परामर्श तथा प्रयाप्त औषधी उपचारको लागि समेत ब्यवस्था गरिने समेत अध्यक्ष यादवले बताउनु भयो ।
गाउँपालिकाका प्रवक्ता तथा वडा नम्बर २ का वडा अध्यक्ष सरोज कुमार पाण्डेले अहिले गाउँपालिकाले सचेतनामूलक कार्यको साथै प्रत्येक पालिकावासिलाई पुग्ने गरी मास्क बितरण गरिने बताउनुभयो ।