बुटवल, २६ माघ । मानव सेवा आश्रमले बुटवलमा सञ्चालन गरेको महायज्ञमा छैठौं दिनसम्म तीनकरोड रुपैयाँ भन्दा बढी रकम संकलन भएको छ । महायज्ञको छैठौं दिन आइतबार मात्रै एक करोड रुपैयाँ भन्दा बढी दान संकलन भएको महायज्ञकी आर्थिक संकलन समितिकी सह–संयोजक रुपा कार्की भण्डारीले जानकारी दिनुभयो ।
महायज्ञको पाँचौ दिनसम्म करिब दुई करोड रुपैयाँ संकलन भएको महायज्ञ आयोजक मूल समिति संयोजक लोकनाथ भुसालले जानकारी दिनुभयो । बुटवल सुख्खानगरस्थित भाटभटेनी सुपरमार्केटको उत्तरतर्फ खुला चौरमा सञ्चालित महायज्ञको अवधि सकिन लाग्दा दान गर्ने दानवीरहरुको संख्या बढ्दै गएको महायज्ञका सह–संयोजक लेखबहादुर कार्कीले बताउनुभयो ।
मानव सेवा आश्रमको प्रदेशस्तरीय चारतले भवन बनाउन र अक्षयकोष स्थापनाका लागि आयोजित महायज्ञमा कथावाचक भागवत भाष्कर कमलनयन गौतमले संगीतमय कथावाचन गरिरहनुभएको छ । महायज्ञमा कलाकारहरुले विभिन्न धार्मिक झाँकी, गीत, नृत्य र नाटकमार्फत मनोरन्जन प्रदान गरेका छन् । संगीतमय भजनमा नाच्ने र रमाउनेको बाक्लो उपस्थिति महायज्ञमा हुने गरेको छ ।
प्रदेश ५ लाई सडक मानवमुक्त बनाई दुईसय जना बेसहारा र असहाय व्यक्तिलाई राखेर पालनपोषण गर्न भवन बनाउने मानव सेवा आश्रमको लक्ष्य छ । माघको २७ गतेसम्म सञ्चालन गरिने महायज्ञमा लक्ष्य अनुसार आर्थिक संकलन हुनेमा आफूहरु विश्वस्त रहेको महायज्ञ मूल समितिका सचिव गुनाराम घिमरले बताउनुभयो । मानव सेवा आश्रमको भवन बनाउन बुटवलको हिलपार्क परिसरमा जग्गाको व्यवस्थापन भइसकेको छ । भवन बनाउन प्रदेश सरकारले २५ लाख वजेट विनियोजन गरेको र बांकी रकम जुटाउन महायज्ञ गरिएको मानव सेवा आश्रमका अध्यक्ष रामजी अधिकारीले बताउनुभयो । महायज्ञको अवधि थप्न भक्तजनहरुले माग गरेपनि अझै निर्णय भइनसकेको महायज्ञका महासचिव माधव नेपालले बताउनुभयो ।
