बुटवल, १० पुस । सिद्धार्थ राजमार्ग अन्तर्गत बेलहिया–बुटवल सडक खण्डको भलवारिमा ट्याङ्करको ठक्करबाट एक युवतीको ज्यान गएको छ । रुपन्देहीको भलवारी चोकमा लु १ ख ६४१६ नम्बरको तेल बोक्ने ट्याङ्करले साइकल यात्रीलाई ठक्कर दिँदा तिलोत्तमा नगरपालिका –७ समावेशी टोल बस्ने १६ वर्षिया रश्मी न्यौपानेको घटनास्थलमै मृत्यु भएको प्रहरीले जनाएको छ ।
भलवारीस्थित नेपाल आयल निगमको डिपोबाट तेल खाली गरेर निगम डिपोबाट सडकमा निस्किदै गरेको ट्याङ्करले पश्चिम तर्फबाट आउँदै गरेको दुई जना सवार साइकललाई ठक्कर दिएको थियो । ट्याङ्करले ठक्कर दिँदा न्यौपानेको घटनास्थलमै मृत्यु भएको छ र साइकलमै सवार सोही स्थानकी ३१ बर्षिय भोजकुमारी केसी गम्भीर घाइते भएकी प्रहरीले जनाएको छ ।
जिल्ला प्रहरी कार्यालय रुपन्देहीका प्रवक्ता प्रहरी नायब उपरिक्षक खड्ग बहादुर खत्रीका अनुसार घाईते केसीलाई मणिग्रामस्थित क्रिमशन अस्पतालमा प्राथमिक उपचार पछि थप उपचारका लागि काडमाडौ रिफर गरिएकोे छ । ट्याङ्कर र चालकलाई प्रहरीले नियन्त्रणमा लिएको पनि उहांले जानकारी दिनुभयो ।
