बुटवल, १९ मंसिर । अन्तर्राष्ट्रिय भारत्तोलन (पावर लिफ्टिङ) खेलमा विश्व च्याम्पियन नेपाली खेलाडी रुप कार्की भारत्तोलन खेलको प्रबद्र्धनका लागि नेपाल आउनु भएको छ ।
रुपन्देही तिलोत्तमा नगरपालिका भलवारी स्थायी घर भै हाल अमेरिकाको भर्जिनियामा बस्दै आउनुभएका कार्की नेपालमा भारत्तोलन खेलको प्रबद्र्धन र आफुले सिकेको सिप नेपाली खेलाडीहरुलाई सिकाउन आज नेपाल आईपुग्नु भएको हो ।
आयरल्याण्डको लाइमेरिकमा भएको माष्टर–२ प्रतियोगितामा विश्वभरका दुई सय बढी देशका करिब सात सय जना प्रतिस्पर्धीलाई पछि पार्दै २ सय २० पौण्ड तौल समूहबाट स्वर्ण पदक जित्न सफल हुनुभएका कार्कीलाई नेपाल आगमन संगै त्रिभुवन अन्तर्राष्ट्रिय विमानस्थलमा स्वागत र सम्मान गरिएको थियो । आयरल्याण्डमा कार्कीको जित माष्टर–२ आइपियलको अन्तर्राष्ट्रिय च्याम्पियनको रेकर्ड हो ।
यस्तै कार्की नेपाल आउने क्रममा अमेरिकाको भर्जिनिया बासि नेपाली समुदायले कार्कीलाई हौसला प्रदान गर्दै भव्य विदाई गरेका थिए । भारत्तोलनमा दोस्रो पटक विश्व च्याम्पियन बनेसंगै देशको राजधानी काठमाडौं लगायत नेपालका अन्य मुख्य शहरहरुमा भारत्तोलन खेलको प्रबद्र्धन र दक्ष खेलाडी उत्पादन गर्ने उद्देश्य सहित कार्की नेपाल आउनु भएको हो ।
यस अघि पहिलो पटक विश्व च्याम्पियन बनेसंगै नेपाल आउनु भएका कार्कीले नेपालका प्रधानमन्त्री केप ओलीलाई भेटेर नेपालमा भारत्तोलन खेलको प्रवद्र्धन र खेलाडी उत्पादनका विषयमा छलफल गर्नुभएको थियो भने काठमाडौंमा भारत्तोलन खेलको प्रशिक्षण समेत दिनुभएको थियो ।
यो क्रममा पनि कार्कीले नेपालका मुख्य शहरहरुमा भारत्तोलन खेलको प्रवद्र्धन संगै आफुले सिकेको सिप प्रदर्शन गर्ने कार्यक्रम छ ।
यसअघि सन् २०१७ मा अमेरिकाको एट्लान्टामा भएको फस्र्ट मास्टर इन्टरनेसनल पावरलिफ्टिङ प्रतियोगितामा पनि विश्व च्याम्पियन बन्दै कार्कीले स्वर्ण पदक जित्नुभएको थियो ।
नेपालको खेल इतिहासमा भारत्तोलन खेलमा स्वर्ण पदक जित्ने पहिलो नेपाली कार्की औषधीको प्रयोग (ड्रग टेस्टेड) विना नै अन्तर्राष्ट्रिय प्रतियोगितामा भाग लिने खेलाडी पनि हो ।
कार्कीको यो सफलतामा कार्कीकी जीवन संगिनी शोभा सुबेदी, छोरा रुपेश र छोरी ज्योतीले साथ र हौसला दिदै आएका छन् । पछिल्लो समय छोरा रुपेश र छोरी ज्योती पनि आफ्नो बाबुको सिको गर्दै भारत्तोलन खेल प्रति आकर्षित भएका छन् ।
