गिनिज वल्ड रेकर्ड्समा दर्ता भएर विश्व किर्तिमान कायम गर्ने अपेक्षा
तिलोत्तमा, १३ मंसिर । जुटौं सारा गाउँ र शहर, शुन्य पोलिथिन तिलोत्तमा नगर, भन्ने नारा सहित आगामी माघ १० गते रुपन्देहीको तिलोत्तमा नगरपालिकालाई पोलिथिन मुक्त क्षेत्र घोषणा गरिने भएको छ ।
पोलिथिन मुक्त क्षेत्र घोषणा हुनु अघि सोहि दिन शान्ति नमुना माध्यमिक विद्यालय मणिग्रामको मैदानमा तिलोत्तमा नगर क्षेत्रमा रहेका ८५ वटा सामुदायिक तथा निजि विद्यालयमा कक्षा ९, १०, ११ र १२ मा अध्ययनरत करिव १५ हजार विद्यार्थीहरुलाई वातावरण सम्वन्धि कक्षा संचालन गरिने छ ।
करिव दुई घण्टासम्म संचालन हुने कार्यक्रममा नगर क्षेत्रका ५ हजार बुद्धिजिवी वर्ग र १५ हजार विद्यार्थी सहित २० हजार जनालाई विश्वको बढ्दो चिन्तन जलवायु परिवर्तन सम्बन्धि परिक्षण दिईने छ ।
यो कार्यक्रम हुनुभन्दा करिव २ महिना अघिदेखि नगर क्षेत्रका हरेक समुदायका अभिभावक विद्यार्थीहरुले सीम नेपालको संयोजन र २०० स्वयमसेवकको रोहवरमा संकलन गरिएको पोलिथिनजन्य फोहोर एक एक झोला लिएर विद्यार्थीह सो कार्यक्रममा सहभागि हुने छन् ।
यस्तो फोहोर कृषि भूमि, खोला, नदि, बाटो, गल्ली, वनजंगल, खोल्सा, पोखरी, नाला लगायतका ठाउंवाट संकलन गरिने छ ।
वातावरण सम्बन्धि आम मानिसमा चेतना फैलाउन र विश्व किर्तिमान राख्न आयोजना गरिएको यस कार्यक्रमलाई “विश्व किर्तिमानी कार्यक्रम” भनिएको छ ।
ग्रीनरी नेपालको अभियान अन्तर्गत ग्रीन हाउस क्रियशन प्रा. लि.को ब्यवस्थापन तथा सीम नेपाल र तिलोत्तमा नगरपालिकाको समन्वयमा यो अभियान मार्फत तिलोत्तमा नगरपालिकालाई पोलिथिन मुक्त क्षेत्र घोषणा गर्न लागिएको हो ।
यो अभियानको नेतृत्व वातावरण विद् विश्व किर्तिमानी कार्यक्रमका अभियन्ता निपेश ढाकाले गर्नुभएको छ । करिव ७ वर्ष अगाडी जर्मनीको विश्वविद्यालयबाट वातावरण विज्ञानमा स्नातकोत्तर गरेर नेपाल पलर्किनु भएका अभियन्ता ढकालले देशका अधिकाँश भूभागको सांस्कृतिक, सामाजिक र पर्यावरणीय अध्ययन र अनुसन्धानबाट बनेको बृत्तचित्र र ३६५ जना राष्ट्रिय कलाकारहरुवाट गीत रेकर्डिङ गराएर गिनिज वल्र्ड रेकर्डस्मा दर्ता गराई सक्नुभएको छ ।
अभियानका विषयमा जानकारी गराउने उद्देश्यले शुक्रवार तिलोत्तमा नगरपालिकामा आयोजित पत्रकार सम्मेलनमा अभियन्ता ढाकाले यो कार्यक्रम व्यवस्थित, मर्यादित र राष्ट्रिय गौरवको बन्ने वताउनु भयो ।
यो अभियानलाई सफल वनाउन नगरका हरेक वडाका टोल विकास समितिहरुसंग समन्वय गरी प्रत्येक विहान सरसफाई कार्यक्रम र वडाका २–२ ठाउँका सभाहलमा अभिभावकहरुलाई कार्यक्रम गरिने अभियन्ता ढाकाले वताउनु भयो । यस्तै वातावरण सम्वन्धि मिलानकोली वृत्तचित्र प्रदर्शन, हरेक साँझ सरसफाई कार्यक्रम गरिने छ भने विभिन्न चार समूहमा विभाजित स्वयमसेवकहरुले हरेक दिन ४ स्थानमा कार्यक्रम गर्नेछन् ।
कार्यक्रममा तिलोत्तमा नगरपालिकाका प्रमुख बासुदेव घिमिरेले तिलोत्तमा नगरपालिका क्षेत्रलाई राष्ट्रिय स्तरबाटै पोलिथिन मुक्त क्षेत्र घोषणा गरिने दृढ संकल्प सहित कार्यक्रम शुरु गरिएको बताउनु भयो । उहांले क्लिन नगरपालिका, ग्रीन नगरपालिका वनाउने अभियान अन्तर्गत सरसफाई कार्यक्रम सहित नगरलाई प्लाष्टिक झोला, ग्लास र प्लेट मुक्त वनाउने अभियान यस अगाडि देखिनै संचालन गरिएको बताउनु भयो ।
नगरपालिकाले संचालन गरेका यस्तै कार्यक्रम देखेर सीम नेपालले सहकार्य गर्न खोजेको हुन सक्ने भन्दै नगरप्रमुख घिमिरेले यो अभियानले नगरपालिकालाई देशकै नमुना वनाउने विश्वास ब्यक्त गर्नुभयो । उहांले फोहोर ब्यवस्थापन तथा प्रशोधनका लागि तिलोत्तमा ८ मा एकिकृत फोहोरमैला ब्यवस्थापनको काम अगाडी बढेको र सडकमा हुने फोहोर ब्यवस्थापनका लागि राजमार्ग र भित्रि सडकमा २५–३० किलो क्षमताका १ हजार थान डष्टविन राख्ने काम समेत अगाडी बढाईएको जानकारी गराउनु भयो ।
केन्द्र सरकारका वन तथा वातावरण मन्त्री शक्ति बहादुर बस्नेत, प्रदेश ५ का उद्योग, पर्यटन, वन तथा वातावरण मन्त्री लिला गिरी, प्रदेश ५ का सांसद, नगरपालिका तथा गाउँपालिकाका प्रमुख, शिक्षक, विज्ञ, भाषविद्, संस्कृतविद् र समाजसेवीहरुको उपस्थितिमा माघ १० गते तिलोत्तमा नगरपालिकालाई पोलिथिन मुक्त क्षेत्र घोषणा गरिने छ ।
यो कार्यक्रम नेपालमा मात्र नभएर विश्वमा समेत एक उदाहरणीय र प्रेरणा मुलक हुने र गिनिज वल्र्ड रेकर्ड्समा समेत दर्ता भएर विश्व किर्तिमान कायम गर्ने अपेक्षा गरिएको छ ।
