बुटवल, १२ असोज । छाला रोगको उपचार गर्ने गरी रुपन्देहीको बुटवलमा लुम्बिनी स्कीन एण्ड लेजर सेन्टर स्थापना गरिएको छ । छाला, कपाल, यौनरोग लगायत छालासंग सम्बन्धित रोगहरुको उपचार गर्ने उद्वेश्यले लेजर सेन्टरको स्थापना गरिएको सञ्चालक हिमलाल ज्ञवालीले जानकारी गराउनुभयो ।
बुटवलको रामनगरमा सञ्चालन गरिएको लेजर सेण्टरको आइतबार प्रदेश पाँचका सामाजिक विकास मन्त्री शुदर्शन बरालले एक कार्यक्रमबीच उद्घाटन गर्नुभयो । सोही कार्यक्रममा बोल्दै मन्त्री बरालले स्वास्थ्य सेवाको पहुंचलाई दुरदराजमा पुराएर जनताको सेवा गर्नुपर्ने बताउनुभयो । उहांले चिकित्सा विज्ञानले सफलता हासिल गरेको उल्लेख गर्दै स्वास्थ्यसेवालाई नाफासंग जोड्न नहुनेमा जोड दिनुभयो ।
स्वास्थ्य सेवालाई सहज तथा सर्वशुलभ बनाउन प्रदेश सरकार प्रतिवद्व भएको उल्लेख गर्दै मन्त्री बरालले स्वास्थ्य सेवाका लागि सरकारले नीजि क्षेत्रसंग सहकार्य गर्ने बताउनु भयो ।
प्रदेश सांसद माधव शर्मा र भोजप्रसाद श्रेष्ठले मानिसको सबै भन्दा ठूलो र महत्वपुर्ण कुरा स्वास्थ्य भएकाले स्वास्थ्य सेवाका लागि प्रदेश सरकार गम्भीर रहेको बताउनुभयो ।
कार्यक्रममा डाक्टर विक्रम ज्ञवाली, डाक्टर जश्मान शाक्य, डाक्टर नन्दा गुरुङ लगायतले बोल्दै लेजर सेण्टर खोल्नु कमाउने उद्वेश्य मात्र नभइ सेवा दिने उद्वेश्य रहेको बताउनुभयो ।
कार्यक्रममा पत्रकार महासंघ रुपन्देही उपाध्यक्ष निरु गौतम, पत्रकार वालकृष्ण चापागाई, वरिष्ठ अधिवक्ता तेजप्रसाद कडेल, पुनाराम पोखरेल लगायतले बोल्दै गुणस्तरीय सेवा दिन आग्रह गर्नुभयो । यमबहादुर थापाको अध्यक्षता र ऋषि आजादको सञ्चालनमा कार्यक्रम भएको थियो ।
