बुटवल, १२ असोज । रुपन्देहीको तिलोत्तमा नगरपालिका ६ बाह्र नम्बर कालिकापथमा रहेको श्री मां कालिकादेवी मन्दिरमा नव दुर्गाको अवसर पारेर दुर्गा पूजा महोत्सव शुरु गरिएको छ ।
वडा दशैंको पहिलो दिन घटस्थापनाको दिन आइतबारदेखि विशेष धार्मिक विधिपूर्वक दुर्गा पूजा महोत्सव शुरु गरिएको छ ।
हिन्दुहरुको महान पर्व दशैंको अवसरमा हिन्दु धर्मबारे नयाँ पुस्तालाई जानकार गराउने उद्वेश्यले दुर्गा पूजा महोत्सवको आयोजना गरिएको मन्दिरका अध्यक्ष निर्मल श्रेष्ठले जानकारी गराउनुभयो ।
नौ दिनसम्म विशेष रुपमा हुने आजापूजामा भक्तजनको घुइचो लाग्ने अध्यक्ष श्रेष्ठले बताउनुभयो ।
संगीतमय देवीभागवत्मा आधारित नवरत्न विशेष कार्यक्रममा आचार्य पण्डित प्रकाश सुवेदीले धार्मिक प्रवचन दिने कार्यक्रम रहेको छ ।
विशेष गरेर हिन्दुहरुको दशैं पर्व के हो भन्नेबारे नयां पुस्तालाई जानकार गराउने र हिन्दु परम्परालाई कायम गर्ने उद्वेश्यले पूजा महोत्सवको आयोजना गरिएको हो । दुर्गा पूजा महोत्सवमा संकलन भएको आर्थिक मन्दिर निर्माणमा खर्च गरिने र सम्भव भएमा अक्षयकोषका लागि समेत रकम संकलन गरिने आयोजकहरुले बताएका छन् । २०७० सालमा स्थापना गरेर दशैंको बेला विशेष धार्मिक कार्यक्रम सञ्चालन गरी ३ लाख ७ हजारको अक्षयकोष स्थापना गरिएको मन्दिर समितिले जानकारी गराएको छ ।
