बुटवल, १२ असोज । रुपन्देहीको तिलोत्तमा नगरपालिका वडा नम्बर दुईमा सञ्चालित जागृति बचत तथा ऋण सहकारी संस्था लिमिडेट र हाम्रो सगरमाथा सहकारी एकीकरण हुने भएका छन् ।
दुवै सहकारीले आफ्नो वार्षिक साधारणसभा मार्फत एकीकरणमा जाने प्रस्ताव पारित गरेका छन् ।
रुपन्देहीको तिलोत्तमा नगरपालिका वडा नम्बर दुईमा सञ्चालित जागृति बचत तथा ऋण सहकारी संस्था लिमिडेटको आईतवार भएको १५ औं वार्षिक साधारणसभाले हाम्रो सगरमाथा सहकारीसंग एकता तथा एकीकरण गर्ने प्रस्ताव पारित गरेको छ ।
जागृति बचत तथा ऋण सहकारी संस्थाको साधारणसभाले चालु वर्ष शैक्षिक तथा अन्य रचनात्मक कार्यक्रमलाई निरन्तरता दिने, शेयर सदस्यहरुलाई सहकारी शिक्षा तालिम प्रदान गर्ने लगायतका प्रस्ताव पारित गरेको अध्यक्ष बेलप्रसाद शर्माले जानकारी दिनुभयो ।
सोही कार्यक्रममा बोल्दै तिलोत्तमा नगरपालिका सहकारी प्रमुख माधव पोखरेलले आयमूलक क्षेत्रमा सहकारीहरुले लगानी बढाउनु पर्ने बताउनुभयो । सहकारीले क्रमस आर्थिक रुपमा आत्मनिर्भर बन्न सहयोग गर्ने भएकाले हरेक मानिसलाई सहकारीमा आवद्व गर्नुपर्नेमा उहांले जोड दिनुभयो । सहकारीलाई राज्यले तीन खम्बे अर्थनीतिको रुपमा अंगीकार गरेकाले आर्थिक विकासमा सहकारीको भूमिका महत्वपूर्ण रहने उहांले बताउनु भयो ।
कार्यक्रममा जनजागृति माध्यामिक विद्यालयका प्रधानाध्यापक टंकप्रसाद पौडेल, हाम्रो सगरमाथा सहकारीका अध्यक्ष गुरुप्रसाद पौडेल, टाकुरा सहकारीका अध्यक्ष रमेश ज्ञवाली, सल्लाहाकार लोकनाथ पाण्डे, यादवनाथ आचार्यलगायतले बोल्नुभएको थियो ।
साधारणसभाले अध्यक्ष बेलप्रसाद शर्माले प्रस्तुत गरेको वार्षिक प्रतिवेदन र कोषाध्यक्ष मनिराम भट्टराईले प्रस्तुत गरेको आर्थिक प्रतिवेदन पारित गरेको छ ।
दुवै सहकारीको वार्षिक साधारण सभाले दुई सहकारी संस्था एकिकरण गर्ने प्रस्ताव पारित गरेकाले एकिकरण गर्नेगरी तयारी गरिने सहकारीका लेखा समिति संयोजक विष्णु गैरेले जानकारी गराउनु भयो ।
