अनिता चौधरी
बुटवल, २२ भदौ । रुपन्देहीको सैनामैना–८ भड्छामा “वड्की अत्तवार” पर्व २०६७ मनाइएको छ । रुपन्देहीमै पहिलो पटक थारु काल्याणकारिणी सभा सैनामैना नगर समितिको आयोजनामा आईतबार एक कार्यक्रम गरी वड्की अत्तवार मनाइएको हो । थारु भेषभुषामा सजिएर आएका थारु युवती तथा महिलाहरुले विभिन्न थारु समुदायको गित तथा संगितमा नृत्य प्रदर्शन गर्दै हर्षेल्लासकासाथ वड्की अत्तवार पर्व मनाएका हुन् ।
कार्यक्रममा प्रदेश नं ५ का भौतिक योजना तथा पूर्वाधार विकास मन्त्री बैजनाथ चौधरीले थारु संस्कार र संस्कृतिको जगेर्ना गर्न आग्रह गर्दै नयाँ पुस्तामा शिक्षाको पहुँच वढाउन आवश्यक भएको बताउनु भयो । उहांले थारु पर्वलाई एकरुपता ल्याउन थारु बुद्धिजिवी, पत्रकार लगायत थारु बौद्धिक समुदायविच बहास र छलफल आवश्यक रहेको बताउनु भयो । थारु समुदायमा भाषा, धर्म र चाड पर्वहरुमा पनि एकरुपता हुन नसक्दा थारु समुदायको पर्वहरु ओझेलमा परेको भन्दै मन्त्री चौधरीले थारु संस्कृतिको संरक्षणमा जोड दिनुभयो ।
कार्यक्रममा प्रदेशसभा सदस्य पुष्पा चौधरीले हरेक क्षेत्रमा थारु समुदाय पछि परेको उल्लेख गर्दै शिक्षालाई प्राथमिकतामा राखेर अधिकार प्राप्तिका लागि राजनीतिमा आउन आग्रह गर्नुभयो ।
सो अवसरमा थारु कल्याणकारी सभाका केन्द्रिय उपसभापति देवी प्रसाद चौधरी, कल्याणकारी सभाका पार्षद द्वय रामवली चौधरी, खुशिराम चौधरी लगायतका थारु अगुवाले वोल्दै संस्कार र सस्कृतिको जगेर्ना सँगसँगै यस्ता खालका कार्यक्रमलाई निरन्तरता दिनुपर्नेमा जोड दिनुभयो ।
कार्यक्रम थारु कल्याणकारिणी सभा सैनामैना नगर समितिका अध्यक्ष दुल बहादुर थारुको अध्यक्षतामा भएको थियो ।
“वड्की अत्तवार” पर्व गत आईतवार बाँके, बर्दिया र दाङमा मनाइएको थियो भने रुपन्देही, कपिलवस्तु र परासी लगायतका जिल्लाहरुमा आज मनाइएको हो । यस पर्वलाई थारु समुदायको महत्वपूर्ण पर्वको रुपमा समेत लिने गरिन्छ ।
