१५ दिन भित्र ट्याँकरको मापदण्ड चेकजाँच गर्न निर्देशन
गुल्मी, १६ भदौ । नेपाल आयल निगमका नायव कार्यकारी निर्देशक शुसिल भट्टराईले निगमको भलवारी डिपोबाट हुने पेट्रोलियम पदार्थको आपुर्ति ब्यवस्थापनलाई सहज र सरल बनाउन थप चारवटा लोडिङ्ग पोइन्ट निर्माणको काम शुरु गर्नलागेको बताउनु भएको छ ।
अहिले एक पटकमा चारवटा गाडीले मात्र लोड अनलोड गरिरहेको डिपोमा एकातिर लोड र अर्कोतिर अनलोड मात्र गर्न मिल्ने गरी यही भदौ महिना भित्र थप ४ वटा फ्लो मिटर सहितको लोडिङ्ग पोइन्ट निर्माणको काम शुरु गरिने निर्देशक भट्टराईले जानकारी गराउनु भएको छ ।
आर्थिक बर्ष २०७५÷७६ मा भएको पेट्रोलियम पदार्थको बिक्री बितरणको समिक्षा, २०७६÷७७ को रणनीति तर्जुमा तथा जिल्लागत ब्यवसायीहरुका समस्या बुझ्न र सुझाव संकलनका लागि आयल निगम र पश्चिमाञ्चल पेट्रोलियम डिलर्स एशोसिएसनले जिल्लागत रुपमा संचालन गरेको ब्यवसायी भेला अन्तर्गत धार्मिक स्थल गुल्मीको रेसुङ्गामा आयोजित भेलामा बोल्दै निर्देशक भट्टराईले ब्यवसायीका मागलाई सम्बोधन गर्दै इन्धनको आपुर्ति ब्वस्थापनलाई सहज र सरल बनाउन लोडिङ्ग पोइन्ट निर्माणको काम शुरु गर्न लागिएको बताउनु भयो । ईन्धनको डिमाण्डका लागि भौचर प्रणालीको अन्त्य गरी अनलाईन प्रविधिको ब्यवस्थापनका लागि तयारी भैरहेको बताउनु भयो ।
निर्देशक भट्टराईले १५ दिन भित्र भारतबाट पेट्रोलियम पदार्थ ढुवानी गर्ने २६५ वटा ट्याँकरहरुको माप दण्ड चेकजाँच गर्न भलवारी डिपोका कर्मचारीलाई निर्देशन दिनु भएको छ । निगमको डिपोबाट तोकिएको परिमाणभन्दा थोरै मात्रामा इन्धन पठाईएको गुनासो ब्यवसायीहरुले गरेपछि निर्देशक भट्टराईले भारतको बैतालपुर गएर सबै गाडीको स्ट्याण्डर्ड जाँच गर्न निर्देशन दिनुभएको हो । उहांले ट्याँकरको क्यलिब्रेशन (ईन्धन भरिएको ट्याँकरमा तोकिएको मात्रामा इन्धन छ कि छैन भनेर नाप लिइने प्रविधि) जाँच गरी मापदण्ड ठिक भएका गाडीलाईमात्र ब्यवसायीहरुकोमा पठाउन र मापदण्ड ठिक नभएका गाडीलाई सोही मापदण्ड अनुसार डिपोमा खाली गर्न निर्देशन दिनुभयो ।
निर्देशक भट्टराईले दुरिका हिसावले पहाडी जिल्लाका ब्यवसायीको लोडलाई पहिलो प्राथमिक्ता दिन आग्रह गर्दै कुन समयमा लोड दिदा लस कम हुन्छ सोही समयमा लाडिङ्गको ब्यवस्था मिलाउन पनि आग्रह गर्नुभएको छ । उहांले ब्यवसायीले अहिले पाईरहेको कमिशन र स्रिंकेज (तापक्रम घट्दा पेट्रोलियम पदार्थ खुम्चिएर घट्ने मात्रा) कम भएको आफुले महशुस गरेको भन्दै बृद्धिका लागि पहल गर्ने ब्यवसयीलाई आश्वासन दिनुभयो । यस्तै ब्यवसायीले राखेको धरौटी रकमको ब्याजका विषयमा पनि गृहकार्य भैरहेको उहांले बताउनु भयो । डिपो देखि पम्पसम्म लकिङ्ग सिष्टमको शुरुवात छिटै गरिने बताउदै निर्देशक भट््टराईले ब्यवसायीको माग अनुसार निजी गाडीबाटै इन्धन उपलब्ध गराउन कुनै समस्या नरहेको बताउनु भयो ।
उहांले निगम भित्रका कमी कमजोरी औलाईदिन ब्यवसायीहरुलाई आग्रह गर्दै उधारोमा इन्धन विक्री गर्ने कार्य रोक्न र अस्वस्थ प्रतिष्प्रधा नगर्न आग्रह गर्नुभयो । निगमले तोकेको मापदण्ड अनुसार पम्पको ब्यवस्थापन र भैतिक संरचना निर्माण गर्नुपर्नेमा जोड दिदै सक्ने जति काम आफै गर्न र नसकेका र नसक्ने कामका लागि संस्थागत रुपमा लेखेर केन्द्रमा पठाउन उहांले आग्रह गर्नुभयो । अन्तर्राष्ट्रिय बजारमा इन्धनको मूल्य बढ्दा पनि निगम नाफामा रहेको बताउंदै निर्देशक भट्टराईले आर्थिक हिसावले पनि निगम धेरै बलियो भैसकेको वताउनु भयो । उहांले ट्याँकरहरुमा लकिङ्ग सिष्टम लागु भएपछि मिसावटमा कमी आउनुका साथै दुर्घटना पनि धेरै कम भएको बताउनु भयो ।
