पाँच लाख धरौटी बुझाएर रवि लामिछाने रिहा

चितवन, ९ भदौ । पत्रकार शालिकराम पुडासैनीको आत्महत्याका लागि दुरुत्साहन गरेको अभियोगमा पक्राउ परेका टेलिभिजन कार्यक्रम प्रस्तोता रवि लामिछानेसहित ३ जना रिहा भएका छन् । उनीहरुलाई चितवन जिल्ला अदालतले सोमबार धरौटीमा छाड्न आदेश दिएको हो ।
जिल्ला अदालत, चितवनका न्यायधीश हेमन्तप्रकाश रावलको इजलासले आत्महत्या दुरुत्साहन गरेको कसूरमा लामिछानेलाई ५ लाख, सञ्चारकर्मी युवराज कँडेललाई ३ लाख र नर्स अस्मिता कार्की (रुकु) लाई साधारण तारेखमा छाड्न आदेश दिएको हो ।
अदालतको आदेशपछि अदालतले तोकेको धरौटी रकम बुझाएर लामिछाने र कँडेल सोमबार नै रिहा भएका हुन् । रवि र युवराजले अब धरौटीमा बसेर मुद्दाको पुर्पक्ष गर्नेछन् ।
पत्रकार शालिकराम पुडासैनीको आत्महत्याका लागि दुरुत्साहन गरेको अभियोगमा रविसहित तीनैजनालाई चितवन र काठमाडौं प्रहरीको संयुक्त टोलीले गएको साउन ३० गते काठमाडौंबाट पक्राउ गरेको थियो ।
पत्रकार पुडासैनीले आत्महत्याअघि अस्मिता, लामिछाने र कँडेलले आफूलाई मर्न बाध्य पारेको भन्दै रेकर्ड गरेको भिडियो सार्वजनिक भएको थियो । पुडासैनीकै आवाजको भिडियो रहेको पुष्टिपछि थप अनुसन्धान गर्न लामिछाने, कार्की र कँडेलमाथि प्रहरीले १० दिनसम्म हिरासतमा राखेर अनुसन्धान गरेको थियो ।
पुडासैनीले भिडियोमा कार्की, लामिछाने र कँडेलले आफूलाई फसाउन खोजेकाले आत्महत्याका लागि विवश बनाएको बताएका छन् । उनी साउन २० गते चितवनको होटल कांगारुमा आत्महत्या गरेको अवस्थामा फेला परेका थिए । टेलिभिजन कार्यक्रम प्रस्तोता लामिछाने पक्राउ परेदेखि नै उनका समर्थकले चितवनमा प्रदर्शन जारी राखेका थिए । प्रदर्शनकै क्रममा भएका झडपमा केही घाइते भएका थिए । सोमबार पनि प्रदर्शन र झडप हुनसक्ने सम्भावनालाई मध्येनजर गर्दै जिल्ला प्रशासन कार्यालय, चितवनले चार किल्ला तोकेर निषेधाज्ञा जारी गरेको थियो ।