बुटवल, ३१ साउन । प्रदेशसभा ५ नेपाल कम्युनिष्ट पार्टी (नेकपा) का प्रमुख सचेतक भूमिश्वर ढकालको घरमा बिहिबारराति पेट्रोल बम अमक्रमण भएको छ । रुपन्देही जिल्लाको सैनामैना ७ मा रहेको ढकालको घरमा बिहिबार मध्यराति ३ वटा पेट्रोल बम प्रहार भएको हो ।
ढकाल सुुत्ने कोठा, उहांका आमाबुवा सुुत्ने कोठा र ढकालले प्रयोग गर्ने लुु १ ज ४५६ नम्बरको सरकारी गाडीमा लक्षित गरी बम प्रहार भएको सचेतक ढकालले जानकारी दिनुभयो । राति दुुईबजेततिर बम प्रहार भएको जानकारी पाएको सचेतक ढकालले बताउनु भयो ।
सचेतक ढकाल भने विगत चार दिनदेखि काठमाडौंको मेडिसिटी हस्टिलमा विरामी भएर उपचारत हुनुहुन्छ । बम कसले प्रहार गर्यो भन्ने खुल्न सकेको छैन ।
प्रहरीका अनुसार प्रहार भएका ३ वटा पेट्रोल बममध्ये गाडीमा लक्षित बम मात्र विस्फोट भएको छ । एउटा बममात्र बिस्फोट भएकाले धेरै धनजनको क्षति हुुन नपाएको स्थानीय प्रत्यक्षदर्शीले बताएकाछन् ।
गाडीमा लागेको आगो छिमेकीहरु जुटेर निभाएका थिए । जिल्ला प्रहरी प्रमुख प्रहरी उपरिक्षक हृदय थापासहितको प्रहरी टोली राति नै घटनास्थल पुगेर घटनास्थलको निरिक्षण गरेको थियो । त्यसक्रममा पेट्रोल र मट्टीतेल भरिएका बम फेला परेको बताइएको छ ।
इलाका प्रहरी कार्यालय सालझण्डी रुपन्देहीका प्रहरी निरिक्षक रवि मैनालीले घटनास्थल पुगेर अनुसन्धान थालेको जानकारी दिनुभयो । घटनाको विस्तृत विवरण आउन बाँकी छ ।
