नवलपरासी उद्योग वाणिज्य संघको टोलीलाई बुटवलमा स्वागतः
बुटवल । नवलपरासी उद्योग वाणिज्य संघको भ्रमण टोलीलाई बुटवल उद्योग वाणिज्य संघ रुपन्देहीमा स्वागत गरिएको छ । दुई दिने संस्थागत भ्रमणमा निस्किएको नवलपरासीको टोलीलाई शुक्रबार बुटवल उद्योग वाणिज्य संघमा स्वागत गरिएको हो ।
त्यस क्रममा व्यवसायीका समस्या उठान गर्दै समाधानका लागि सामुहिक प्रयासमा जोड दिईएको छ । कार्यक्रममा नवलपरासी उद्योग वाणिज्य संघको टोलीलाई स्वागत गर्दै बुटवल उद्योग वाणिज्य संघका कार्यवाहक अध्यक्ष टंकप्रसाद गैरेले बुटवलको औद्योगिक तथा व्यवसायिक विकासमा बुटवल उद्योग वाणिज्य संघको उल्लेखनीय योगदान रहेको बताउनु भयो । उहाँले बुटवल उद्योग वाणिज्य संघले अघि सारेको अवधारणा अनुसार मोतिपुर औद्योगिक क्षेत्र अगाडि बढेको जानकारी गराउँदै मोतिपुर औद्योगिक क्षेत्र निर्माण पश्चात यस क्षेत्रको औद्योगिक विकास र उद्यमशिलता विकासले तिब्र गति लिने विश्वास व्यक्त गर्नुभयो । उहाँले परासीका कोही उद्योगी ब्यवसायीले लगानी गर्न चाहेमा संघले सहजिकरण गरिदिने पनि बताउनु भयो ।
त्यस अवसरमा नवलपरासी उद्योग वाणिज्य संघले बुटवलका उद्योगी व्यवसायीलाई परासीमा आएर उद्योग व्यवसायमा लगानी गर्न निम्ता दिएको छ । नवलपरासी उद्योग वाणिज्य संघका अध्यक्ष ओमप्रकाश अग्रहरीले बुटवल तथा आसपासका लगानीकर्ता उद्योगी व्यवसायीलाई परासीमा आएर उद्योग व्यवसाय गर्न आग्रह गर्नुभएको हो ।
उहाँले उद्योगमा लगानी गर्न आउने लगानीकर्तालाई नवलपरासी उद्योग वाणिज्य संघले स्वागत सहित सहजिकरण गर्ने प्रतिवद्धता पनि व्यक्त गर्नुभयो । नेपालकै मध्येभागमा रहेको परासीमा बुटवलमा भन्दा तुलनात्मक रुपमा धेरै सस्तोमा जग्गा प्राप्त हुने र रामग्राम सहित अन्य पर्यटकीय गन्तव्य पनि भएकाले पर्यटन उद्योगको समेत सम्भावना औंल्याउँदै उहाँले लगानीका लागि निम्तो दिनुभएको हो ।
कार्यक्रममा सहभागीलाई धन्यवाद ज्ञापन गर्दै बुटवल उद्योग वाणिज्य संघका उद्योग उपाध्यक्ष सुरज भट्टराईले औद्योगिक विकासमा भईरहेको अवरोध चिर्नेगरी व्यवसायिक संस्थाहरुले काम गर्नुपर्ने बताउँदै त्यसका लागि सबै संघको एकतावद्ध प्रयासमा जोड दिनुभयो ।
त्यस अवसरमा व्यवसायीका समस्याहरुको बारेमा छलफल भएको थियो । सिमा क्षेत्रका उद्योगी व्यवसायीका प्रमुख समस्या खुला सिमा भएको औंल्याउँदै खुला सिमा व्यवस्थापनमा जोड दिईएको बुटवल उद्योग वाणिज्य संघका महासचिव मुक्तिप्रसाद अधिकारीले बताउनु भयो ।
कार्यक्रममा बुटवल उद्योग वाणिज्य संघका कार्यकारी निर्देशक मदनकुमार कार्की र नवलपरासी उद्योग वाणिज्य संघका कार्यकारी सचिव रामशंकर कुर्मीले संघको स्थापना र त्यसयता संघबाट भएगरेका काम, विधानमा भएका व्यवस्था, संघमा सञ्चालित कार्यक्रमहरुको बारेमा जानकारी गराउनु भएको थियो ।
कार्यक्रममा संघका पदाधिकारीहरु वाणिज्य उपाध्यक्ष विमलराज भट्टराई, कोषाध्यक्ष बसन्तप्रसाद ढकाल सहित कार्यसमिति सदस्यहरु र नवलपरासी उद्योग वाणिज्य संघका पदाधिकारी तथा कार्यसमिति सदस्यहरुको सहभागिता रहेको थियो ।
