तिलोत्तमा । रुपन्देहीको तिलोत्तमा नगरपालिकाले ५० प्रतिशत अनुदानमा कृषि औजार तथा पशु सामाग्री वितरण गरेको छ । नगरपालिकाको परिसरमा पशुपालक कृषकहरुलाई घाँस काट्ने मेसिन, पाऊ म्याट, ब्रस कटर, गोठ सफा गर्ने मेसिन लगायत ७ प्रकारका मेसिन ५० प्रतिशत अनुदानमा ३१ जनालाई बितरण गरिएको हो ।
व्यावसायिक कृषि गर्दै आएका कृषकहरूलाई ५० प्रतिशत अनुदानमा कृषि औजार वितरण गरिएको हो । कृषकहरुलाई आबेदनको आधारमा कृषि औजार वितरण गरिएको नगर प्रमुख रामकृष्ण खाणले बताउनुभयो । नगरपालिकामा रहेका पशुपालक कृषकलाई खाना शुद्धता र गोठलाई सफाई गर्नका लागि उपकरण अनुदानलाई प्राथमिकता दिइएको नगरप्रमुख खाणको भनाइ छ ।
दुग्ध र मासुको उत्पादन वृद्धि गर्न पालिकाले पशुपालक कृषकलाई प्रोत्साहन गर्दै आएको नगर उपप्रमुख जागेश्वर देवी चौधरीले बताउनुभयो । उहाँले आगामी बजेटमा समेत कृषक तथा पशुपालकका लागि उपयोगी कार्यक्रमहरु लिएर आउने समेत बताउनुभयो ।
कार्यक्रममा प्रमुख प्रशासकीय अधिकृत नारायण अर्यालले यस्ता सामग्रीले पशुपालक कृषकहरुलाई थप प्रोत्साहित गर्ने हुँदा नगरपालिकाले यस्ता कार्यक्रमलाइ बिशेष जोड दिएको बताउनुभयो । कार्यक्रममा वडा नम्बर–६ का अध्यक्ष गणेश पाठक, वडा नम्बर ५ का सदस्य हिरा गिरी (डायमण्ड), पशु शाखाका प्रमुख राजु कुँवर मगर, पशु डाक्टर ईन्द्रकला खत्री लगायतले यस्ता कार्यक्रमले पशुपालन प्रति कृषकहरुको आकर्षण बढ्ने बताउनुभयो ।
