तिलोत्तमा । तिलोत्तमा नगरपालिकाले किसानहरुलाई कृषक सेवा कार्ड वितरण शुरुवात गरेको छ । परम्परागत कृषि प्रणालीलाई आधुनिकीकरण गरी प्रबिधिमा आधारित व्यवसायिक रुपमा कृषि खेति गर्नका लागि तिलोत्तमा–१४ टिकुलिगढ़मा कार्ड वितरण शुरु गरिएको हो ।
सो अवसरमा कृषि क्षेत्रको प्रबद्र्धन गर्न सो कार्ड वितरण गरिएको नगर प्रमुख रामकृष्ण खाणले बताउनुभयो । नगरपालिकाका ग्रामीण भेगका किसानहरुलाई कृषि उत्पादनमा आवश्यक मल, बीऊ बिजन, सिंचाई र अनुदानका लागि कृषक सेवा कार्डले ठुलो योगदान दिने नगरप्रमुख खाणले जिकिर गर्नुभयो । कृषकका पसिनाले आर्जेको उत्पादनलाई बजारीकरण गर्न नगरपालिकाले ठुलो योजना बनाएको बताउंदै उहाँले कृषि क्षेत्रमा लगानी गर्नको लागि नयाँपुस्तालाई अग्रसर गराउनुपर्ने समेत बताउनुभयो ।
कार्यक्रममा बोल्दै तिलोत्तमा नगरपालिका वडा नम्बर १४ का अध्यक्ष अस्बिंन पौडेलले किसान कार्डमार्फत कृषकहरुले आफूलाई आवश्यक परेको कृषि सामग्रीहरु, बीऊ, मल, किटनाशक औषधी लगायतका सामानहरु सहुलियतमा नजिकको पसलबाट खरिद गर्न र अनुदान प्राप्त गर्न समेत सहज हुने बताउनुभयो ।
कार्यक्रमको पहिलो चरणमा १९ जना कृषकलाई सो कार्ड बितरण गरिएको छ । कार्यक्रममा वडा सदस्य भुपाल सिंह छन्तेल, बिष्णुमाया पुन, सन्तवीर चौधरी, कृषि शाखा प्रमुख दोमलाल भुसाल, कृषि अधिकृत रामप्रसाद खनाल, सौरभ बस्ताकोटी, वडा सचिव तेजेद्र बस्नेत, कृषि प्राबिधिक अस्मिता ज्ञवाली, बिन्दु रायमाझी लगायत स्थानीय कृषकहरुको उल्लेख्य सहभागिता रहेको थियो ।
