बुटवल । होटल तथा रेष्टुरेण्ट व्यवसायी संघ रुपन्देहीको अध्यक्षमा माधवकुमार खनाल सर्वसम्मत चयन भएका छन् । संघको शनिबार बुटवलमा सम्पन्न २४ औं साधारणसभा तथा १२ औं अधिवेशनबाट खनाल सर्वसम्मत रूपमा अध्यक्ष चयन भएका हुन् ।
यस्तै संघको वरिष्ठ उपाध्यक्षमा अर्जुन थापा, पर्यटन उपाध्यक्षमा रोमाकान्त पाण्डे, प्रथम उपाध्यक्षमा थम्मनबहादुर भण्डारी (क्षेत्री), द्वित्तीय उपाध्यक्षमा प्रेमप्रसाद भट्टराई, महासचिवमा केशवराज कँडेल, कोषाध्यक्षमा अर्जुन पोखरेल, सचिवमा बाबुराम अर्याल, सहसचिवमा डिल्लीराज अर्याल (दीपक) र सहकोषाध्यक्षमा खुमराज ज्ञवाली (राजन) सर्वसम्मत चयन भएका छन् ।
यस्तैगरी, सदस्यहरूमा युवराज पराजुली, जनक पाण्डे, गोकर्ण रायमाझी, श्रीराम भण्डारी, सन्तोष खड्का, केशवराज पाण्डेय, एकदेव पाण्डेय (सुरज), सुन्दरकुमार श्रेष्ठ, पिताम्बर खनाल, दामोदर उपाध्याय र नारायणप्रसाद श्रेष्ठ चयन भएका छन् ।
अधिवेशनको बुटवल उपमहानगरपालिकाका नगरप्रमुख खेलराज पाण्डेयले उद्घाटन गर्नुभएको थियो । सोही अवसरमा बोल्दै नगर प्रमुख पाण्डेयले बुटवलबाट प्रदेश राजधानी दाङ सारिएपछि यस क्षेत्रको होटल व्यवसाय खस्किएको बताउनुभयो ।
उहांले बुटवलबाट प्रदेश राजधानी सारिएपछि यस क्षेत्रको होटल व्यवसायमा धक्का लागेको उल्लेख गर्दै बुटवलबाट राजधानी सरे पनि व्यवसायीको हौसलाले बुटवलको व्यापारमा केही कमि आए पनि चलिरहेको बताउनुभयो ।
बुटवल सम्भावनाको शहरको रूपमा विकास हुँदै गएको भन्दै उहांले यहाँका होटल व्यवसायीले आत्मनिर्भर योजना अघि सार्नुपर्नेमा जोड दिनुभयो ।
कार्यक्रममा उपप्रमुख सावित्रा देवी अर्यालले भारतबाट मुक्तिनाथ पुग्ने तीर्थयात्रीहरूका लागि बुटवल विश्रामस्थलको रूपमा विकास गर्नुपर्ने धारणा राख्नुभयो । उहांले बुटवललाई पर्यटकीय र सांस्कृतिक शहरको रूपमा विकास गर्नेगरी उपमहानगरपालिकाले काम गरिरहेको बताउनुभयो ।
