भैरहवा । जिल्ला प्रहरी कार्यालय रुपन्देहीले कर्तव्य ज्यान मुद्धाका फरार अभियुक्तलाई १९ बर्ष पछि पक्राउ गरेको छ ।
प्रहरीका अनुसार मिति २०६३ साल भदौ २८ गते जिल्लाको साबिक बगौली गा.बि.स. वडा नं. ५ हाल मर्चवारी गाउँपालिका वडा नं. ६ बगौली बस्ने वर्ष ३५ को दशरथ कुर्मी लगाएतका व्यक्तिहरुले जिल्ला रुपन्देही साबिक सिलौटिया गा.बि.स. वडा नं. १ हालमर्चवारी गाउँपालिका वडा नं. ४ महादेवा बस्ने वर्ष ३५ को पुजारी कुर्मीलाई घरबाट लिई गई कर्तव्य गरी हत्या गरेका थिए । निज पुजारी कुर्मीको शब हत्या भएको ४ दिन पछि भदौ ३१ गते दिउँसो सोही ठाउँ स्थित धान खेतमा सडी गलि सकेको अवस्थामा फेला परेको थियो ।
सोही घटना देखि फरार रहेका अभियुक्तहरुलाई खोजतलास एवम् अनुसन्धान गर्दै जादाँ इलाका प्रहरी कार्यालय मर्चवार रुपन्देहीबाट खटिएको प्रहरी टोलीले गोप्य सूचनाको आधारमा भारतबाट नेपाल घरतर्फ आउदै गर्दा २०८२ साल बैशाख २८ गते जिल्लाको मर्चवारी गाउँपालिका वडा नं.३ सुरहवा खोलाबाट फरार अभियुक्त दशरथ कुर्मीलाई १९ बर्ष पछि पक्राउ गरेको हो ।
पक्राउ परेका कुर्मीलाई रुपन्देही जिल्ला अदालतको आदेशमा ५ दिनको म्याद थप भई हाल इलाका प्रहरी कार्यालय मर्चवारबाट थप अनुसन्धान कार्य भईरहेको प्रहरीले जनाएको छ ।
