बुटवल । रुपन्देहीको तिलोत्तमा नगरपालिका स्थित शंकरनगर वन विहार तथा अनुसन्धान केन्द्र (वनवाटिका)मा चुनावी माहोल सुरु भएको छ । वनवाटिकाको चौथो अधिवेशनबाट नयाँ नेतृत्वका लागि बिभिन्न ब्यक्तिहरुले बिभिन्न पदमा उम्मेदवारी दर्ता गराएका छन् ।
यसैबीच मंगलबार पत्रकार सम्मेलन गरी अध्यक्ष पदका उम्मेदवार किरण खरेलले आफ्नो समूहको २४ बुँदे प्रतिवद्धतापत्र जारी गर्नुभएको छ । बनबाटिकामा आयोजित पत्रकार सम्मेलनमा अध्यक्ष पदका उम्मेदवार खरेलले चार वर्षको प्रतिवद्धता पत्र सार्वजनिक गर्नुभएको हो । उहांले प्रतिवद्धतापत्रमा आफूले गर्न सकिने र सम्भव हुने कामलाई मात्रै प्राथमिकता दिएको बताउनुभयो । प्रतिवद्धतापत्रमा उल्लेख गरिएका सबै काम बुँदागत रुपमा अघि बढाउने उहांले बताउनुभयो ।
सबै संरचना पूरा भएको वनवाटिका जस्तै नमूना पार्क नेपालमा अन्यत्र कतै नरहेको खरेलले दाबी गर्नुभयो । अहिलेसम्म बनबाटिकामा आर्थिक पारदर्शिताको अभाव रहेको भन्दै खरेलले यसलाई ब्यवस्थित गर्दै अघि बढ्ने र सफ्टवेयर प्रणाली, अनलाईन सिस्टमलाई थप ब्यवस्थित ढंगले अगाडि बढाइने उल्लेख गर्नुभयो । प्रविधिको जमाना अनुसार ब्यवस्थापनमा जोड दिइएको र निर्माणको क्रममा टेण्डर प्रणाली अघि बढाउने लक्ष्य समेत रहेको उहांले बताउनुभयो ।
नेपाली कांग्रेस र नेकपा एमालेको गठवन्धनबाट बनेको आफ्नो टिम समावेशी भएको उहांको दाबी छ । “सबै खाले राजनितिक दलसँग समन्वय गरिएको छ”– अध्यक्ष पदका उम्मेदवार खरेलले भन्नुभयो । कुल १४ पद मध्य नेकपा एमालेलाई अध्यक्ष, कोषाध्यक्ष, कार्यसमिति सदस्य ३ र लेखा समितिका दुई सदस्य भागमा परेको छ । यस्तै नेपाली काँग्रेसको भागमा उपाध्यक्ष र सचिव सहित ४ सदस्य र लेखा समिति संयोजक परेको छ । दुई दलले यसरी पद भागवण्डा गरेर खरेल नेतृत्वको प्यानल चुनावी मैदानमा उत्रिएको छ । कांग्रेसको भागमा परेको लेखा समिति संयोजक पदमा प्रदिप पराजुली निर्विरोध भैसक्नुभएको छ ।
एमाले कांग्रेसको गठबन्धन अनुसार अध्यक्षमा किरण खरेल, उपाध्यक्षमा मिनप्रसाद देवकोटा, सचिवमा हरिकला अधिकारी(कमला), कोषाध्यक्षमा मनिराम भट्टराईको उम्मेदवारी परेको छ । यस्तै कार्यसमिति सदस्यमा मनोज खड्का, बिन्दु ढकाल, सरस्वती बराल, शँकर भण्डारी, पार्वती क्षेत्री, राजुप्रसाद उपाध्याय र लक्ष्मण मल्ल तथा लेखा समिति सदस्यमा विष्णुप्रसाद सुवेदी र मिठुमाया पौडेलको उम्मेदवारी परेको छ ।
७७३ जना सदस्यहरु रहेको वनवाटिकामा १० लाख रुपैयाँ मासिक संचालन खर्च हुने गरेको छ । वनवाटिका ३२ जना कर्मचारी कार्यरत रहेका छन् ।
बनबाटिकाको निर्वाचन यही चैत २२ गते हुनेछ । लेखा समिति संयोजक बाहेक सबै पदमा निर्वाचन हुनेछ ।
