अर्घाखाँची । अर्घाखाँची जिल्लाको शितगंगा नगरपालिका–२ भुवनपाटामा आज भएको बस दुर्घटनामा परी चार जनाको मृत्यु भएको छ । अर्घाखाँचीबाट नवलपरासीतर्फ जाँदै गरेको लु २ ख ३०३ नम्बरको बस भुवनपाटा स्थित सडकबाट खसेर दुर्घटना भएको हो ।
बस दुर्घटनामा परी मृत्यु हुनेमा रुपन्देहीको बुटवल उपमहानगरपालिका–८ बस्ने ५५ वर्षीय जमुना बस्याल, पश्चिम नवलपरासी भुमही बस्ने अन्दाजी ४५ वर्षीया उमा न्यौपाने र उमाकी सासु ६५ वर्षीय (नाम नखुलेकी) रहेका छन् ।
दुर्घटनामा पश्चिम नवलपरासी बर्दघाट बस्ने वर्ष ५० का बस चालक मदनकुमार विकको पनि मृत्यु भएको प्रहरीले जनाएको छ ।
दुर्घटनामा परी २८ जना यात्रु घाइते भएका छन् । जसमध्ये पश्चिम नवलपरासी बर्दघाट नगरपालिका–१२ बस्ने ३६ वर्षीय सन्तोष कँडेल, ४ वर्षीय अमर कँडेल, ३१ वर्षीय आशिष अधिकारी, २७ वर्षीया लक्ष्मी अधिकारी, ४ वर्षीया आन्दा अधिकारी, १४ वर्षीय आयान्स अधिकारीको अवस्था गम्भीर भएकोले थप उपचारका लागि बुटवल रेफर गरिएको अर्घाखाँची प्रहरीले जनाएको छ । अन्य घाइतेको प्राथमिक स्वास्थ्य केन्द्र ठाडामा उपचार भैरहेको छ ।
प्रहरीका अनुसार नवलपरासीबाट अर्घाखाँची भ्रमण गरेर फर्किने क्रममा ओरालोमा ब्रेक फेल भई बस दुर्घटनामा परेको अनुमान गरिएको छ ।
