भैरहवा । रुपन्देहीको सिद्धार्थनगर नगरपालिकाका प्रमुख (मेयर) इश्तियाक अहमद खाँले भैरहवामा रहेको जिल्ला कारागार स्थानान्तरणका लागि गृहमन्त्री रमेश लेखकसँग आग्रह गर्नुभएको छ । रुपन्देहीको जिल्ला कारागार जिल्ला सदरमुकाम स्थित सिद्धार्थनगर (भैरहवा) मा रहेकोछ ।
घना बस्तीको बीचमा कारागार हुँदा विभिन्न समस्या भएको तथा नगरको सुन्दरतामा समेत नकारात्मक प्रभाव परेको भन्दै मेयर खाँले सोमबार स्थानान्तरण गर्न गृहमन्त्री लेखकसँग आग्रह गर्नुभएको हो । प्रमुख खाँले कारागारको जग्गा सरकारले नगरपालिकालाइ दिनुपर्ने र सोको सट्टा नगरपालिकाले कारागारलाई अन्यत्र जग्गा दिने जानकारी गृहमन्त्री लेखकलाई गराउनुभएको थियो ।
जवाफमा गृहमन्त्री रमेश लेखकले कारागारको नयाँ बन्ने भवनका लागि बजेटको सुनिश्चितता गरेर स्थानान्तरण गर्ने आश्वासन दिनुभयो । मेयर खाँको प्रस्ताव सकारात्मक र समयसापेक्ष रहेको उल्लेख गर्दै मन्त्री लेखकले भवन निर्माणको लागि आगामी बजेटमा पहल गर्ने जानकारी दिनुभयो ।
गृहमन्त्री संगको भेटपछि मेयर खाँले शहरको बिचबाट कारागार स्थानान्तरण गर्न गृहमन्त्री सकारात्मक रहेको उल्लेख गर्दै नगरपालिकाले पटखौलीमा ल्याण्डफिल्ड साईटका लागि खरिद गरेको ६ बिगाह जग्गा कारागारलाई दिन सकिने जानकारी गराउनुभयो । यसकालागि तत्कालीन गृहमन्त्री बालकृष्ण खाँणको पालामा प्रक्रिया अगाडी बढेको र त्यसलाई मुर्तरुप दिन बर्तमान गृहमन्त्रीसंग आग्रह गरेको प्रमुख खाँले बताउनुभयो ।
ल्याण्डफिल्ड साईटकालागि खरिद गरिएको जग्गामा स्थानीयले अवरोध गरेपछि उक्त योजना अगाडी बढ्न सकेको छैन । हाल नगरपालिकाले फोहोर ब्यबस्थापनको लागि निजि क्षेत्रसंग साझोदारी गरी अगाडी बढ्ने गरी प्रस्ताव आह्वान गरेको छ । साझेदारीकालागि दुईबटा फर्मले प्रस्ताव पेश गरेका छन् ।
अन्तिम सूचना प्रकाशनकोलागि कार्यबिधी निर्माण भैरहेको र फोहोरको दिर्घकालिन व्यवस्थापन छिट्टै अगाडी बढ्ने पनि मेयर खाँले जानकारी दिनुभयो ।
