भैरहवा । रुपन्देही क्रिकेट संघको आयोजनामा भैरहवामा जारी ११ औं संस्करणको ‘स्वर्गीय शेरबहादुर सेन्चुरी स्मृति टी–२० अन्तरविद्यालय क्रिकेट प्रतियोगिता’मा शनिबार भएका दुई खेलमा काशी नोबल एकेडेमी र नेपाल नालन्दा इङ्गलिस बोर्डिङ हाई स्कूल विजयी भएका छन् । काशीले लुम्बिनी वल्र्ड स्कूललाई ९२ रनले पराजित गर्दा नालन्दाले बृहस्पति हाई स्कूलमाथि ४० रनको जित निकाल्यो ।
भैरहवास्थित सिद्धार्थ क्रिकेट मैदानमा भएको पहिलो खेलमा टस हारेर ब्याटिङको निम्तो पाएको काशीले निर्धारित २० ओभरमा ४ विकेटको नोक्सानीमा १ सय ३२ रनको बलियो योगफल बनायो । उसका लागि आयुष भण्डारीले अविजित ३५, आयुष दुवेले २० र अभिष अधिकारीले १५ रन बनाए । बलिङमा लुम्बिनी वल्र्डका गोकर्णराज भण्डारीले २ तथा करण पोखरेलले १ विकेट लिए ।
जवाफी ब्याटिङ गरेको लुम्बिनी वल्र्ड स्कूल १० ओभर ३ बलमा अलआउट हुँदै ४० रनमै समेटियो । उसका लागि अजितेसराज गुप्ताले सर्वाधिक ६ रन बनाए । बलिङमा उसलाई सस्तैमा रोक्न काशीका आदित्य शर्मा र आर्यन भण्डारीले ३–३ तथा आर्यन जैसवालले १ विकेट लिए । खेलमा काशीका आदित्य शर्मा म्यान अफ द म्याच भई पाँच सय रुपैयाँ प्राप्त गरे ।
दोस्रो खेलमा टस जितेर ब्याटिङ गरेको नेपाल नालन्दाले १४ ओभर १ बलमा सबै विकेट गुमाएर ८२ रन बनायो । उसका लागि अब्दुल रहमान खानले १८ र आदित्य हरिजनले ११ रन बनाए । बलिङमा बृहस्पतिका आयुष टण्डनले ४, अंकित भण्डारीले २, प्रेम तेली र हिमाल परियारले १–१ विकेट लिए ।
जवाफी ब्याटिङ गरेको वृहस्पतिले १२ ओभर ४ बलमा सबै विकेट गुमाएर जम्मा ४२ रन मात्रै बनायो । उसका लागि रञ्जित अर्याल र हिमाल परिवारले समान ५ रन बनाए । बलिङमा नालन्दाका प्रभात यादवले ३ ओभर ४ बलमा १० रन खर्चेर ६ विकेट लिए । यस्तै, आदित्य हरिजनले २ विकेट लिए । नालन्दाका प्रभात यादव म्यान अफ द म्याच भई पाँच सय रुपैयाँ पाए ।
पर्वत ज्वेलर्स, बैंकरोड, भैरहवाको मुख्य प्रायोजनामा जारी प्रतियोगिताको विजेता टिमले ५० हजार, उपविजेताले २५ हजारसहित ट्रफी, मेडल र प्रमाणपत्र प्राप्त गर्नेछन् । यस्तै, म्यान अफ द सिरिजले १० हजार, बेष्ट ब्याटर र बेष्ट बलरले जनही ५ हजार, प्रत्येक खेलको म्यान अफ द म्याचले ५ सय तथा बेष्ट अनुशासित टिमले ट्रफी र प्रमाणपत्र प्राप्त गर्ने खेल संयोजक भरत थापाले बताए । पुस २ गतेसम्म चल्ने प्रतियोगितामा जिल्लाका विभिन्न विद्यालयका २३ टिम सहभागी छन् ।
