बुटवल । बुटवलबाट काठमाडौँ जाँदै गरेको विङ्गर गाडी पहिरोमा पुरिँदा चालक सहित बुटवलका १४ जनाको ज्यान गएको छ । पहिरोमा पुरिएर जिप चालक रमेश लुइँटेलको समेत ज्यान गएको छ ।
पृथ्वी राजमार्गको नागढुंगा–नौबिसे सडक खण्डमा माथिबाट झरेको पहिरोमा परेर अहिलेसम्म १४ जनाले ज्यान गुमाएका छन् । ती मध्ये १३ जनाले बुटवलबाट टिकट लिएको र १ जना नारायणगढबाट चढेका यात्रु हुन सक्ने बताइएको छ ।
पश्चिम नेपाल बस व्यवसायी प्रालिका अनुसार शुक्रबार बिहान काठमाडौँ जानका लागि बुटवलको ट्राफिक चोकमा रहेको काउन्टरबाट १० जना र राजमार्ग चौराहाबाट टिकट लिएर ३ जना चढेका थिए । यात्रुहरूले नाम नलेखाई समूहमा चढेका कारण टिकट काउन्टरबाट चलानी सिटमा ४ जनाको मात्रै नाम उल्लेख गरिएको छ । ती मध्ये, बोम कार्की र प्रकाश कुंवर मात्रै उल्लेख गरिएको छ भने एक जनाको मोबाइल नम्बर मात्रै उल्लेख छ ।
पश्चिम नेपाल बस व्यवसायी प्रालिका टिकट शाखा कर्मचारी लक्ष्मण पोखरेलका अनुसार बुटवल कालिकानिरका ३ जना, देवीनगरका ३ जना र सुख्खा नगरका ३ जना यात्रुले टिकट काटेका थिए । मृतकहरुको अझै सनाखत हुन सकेको छैन ।
नागढुंगा–नौबिसे सडक खण्डको झ्याप्लेखोलामा झरेको पहिरोमा उक्त विङ्गर गाडी पुरिएको थियो । प्रहरी प्रभाग नागढुंगाका अनुसार मृतक सबै बुटवलका हुन मृतक मध्ये बुटवल सेमलारकी सिर्जना कुंवर र उनका आफन्त २ जना रहेका छन् । पहिरोमा उक्त जिपसङै एउटा कार समेत पुरिएको र उद्धार चलिरहेको प्रहरीले बताएको छ ।
सशस्त्र प्रहरी बल नेपाल नं १८ निलबाराही गणबाट डिएसपीको कमान्डरमा ३५ जना टोली उद्धार र खोजीमा खटिएको छ ।
